کرێکارانی کۆمپانیای "پویا نەخی ئیلام" لە بەردەم باڵەخانەی پارێزگاریی ئیلام گردبوونەوە و داوای چاککردنی دۆخی گوزەران و دیاریکردنی چارەنووسی پیشەیی خۆیان دەکەن.
رۆژی شەممە، ژمارەیەک لە کرێکارانی کۆمپانیای پویا نەخ بۆ چەندەمین جار گردبوونەوەیەکی ناڕەزایەتییان ڕێکخست. کرێکارەکان ڕایدەگەیێنن، دوای چەندین مانگ لە بێبەشبوون لە مافەکانیان و ڕووبەڕووبوونەوەی دۆخێکی نادیار، تاوەکو ئێستا هیچ وەڵامێکی ڕوونیان لە لایەن بەڕێوەبەرایەتیی کۆمپانیاکە و بەرپرسانی پارێزگاکەوە وەرنەگرتووە.
بەشداربووانی گردبوونەوەکە داوا دەکەن کۆتایی بە "دۆخی هەڵپەسێردراوی" پیشەکانیان بهێنرێت. ئەوان داوای گەرەنتیی بۆ بەردەوامیی کار و دابینکردنی شایستە داراییەکانیان دەکەن، کە بە گوتەی خۆیان ماوەیەکی درێژە بەهۆی کێشە ناوخۆییەکانی کۆمپانیاکەوە پشتگوێ خراون.
کۆمپانیای پویا نەخی ئیلام یەکێکە لە یەکە پیشەسازییەکانی پارێزگاکە، بەڵام لە چەند ساڵی ڕابردوودا بەهۆی کێشەی دارایی و کەمبوونەوەی ئاستی بەرهەمهێنان، کرێکارەکانی چەندین جار ڕووبەڕووی مەترسیی بێکاری و دواکەوتنی مووچە بوونەتەوە و ناچار بوون پەنا بۆ گردبوونەوەی ناڕەزایەتی بەرن.
