بریارنامەى مەحکومکردنى کۆمارى ئیسلامى ئێران لەبەر پێشێلکردنى ئاشکراى مافى مرۆڤ، لە ناوەندى ڕێکخراوى نەتەوە یەکگرتووەکان، پەسەند کرا!
لەو دانیشتنەدا کە ڕۆژى چوارشەممە و بە ئامادەبوونى ٨٢ وڵاتى ئەندامى ڕێکخراوى نەتەوە یەکگرتووەکان بەڕێوە چوو، بڕیارنامەى پێشنیارکراوى کەنەدا لەمەڕ پێشێلکردنى ئاشکراى مافى مرۆڤ لە لایەن کۆمارى ئیسلامییەوە گفتوگۆى لەسەر کرا و دواتر پەسەند کرا.
لەم دەنگدانەدا، ١٧ ئەندامى ڕێکخراوى نەتەوە یەکگرتووەکان، بەشدارییان نەکرد و ٣٠ وڵاتیش لەوانە عێراق و ئەندۆنیزیا و لوبنان دژى وەستانەوە و دەنگى دژیان دا.
گەڵاڕێزانى پێشوو بوو کە ئەم بڕیارنامەیە لە کۆمیتەى سێیەمى نەتەوە یەکگرتووەکان بە ٧٩ دەنگى بەڵێ و ٣٢ دەنگى دژ پەسەند کرا. لەم بڕیاڕنامەیەدا ئاماژە بە ژمارەیەک پێشێلکارى مافى مرۆڤ لەوانەش ددانپیانانى ناچارى و لە ئەنجامى ئەشکەنجەوە، ئیعدامى منداڵانى تاوانبار، مەرگى گوماناوى لە زیندانەکان، دەستبەسەرکردنە خۆسەرییەکان، پاڵەپەستۆ دژى کەمینەکان لەوانەش هاووڵاتیانى بەهایی کراوە و داوا لە کۆمارى ئیسلامى کراوە کە دەستبەسەرکراوەکانى خۆپێشاندانە ئاشتیخوازانەکانى گەڵاڕێزانى ساڵى ٩٨ى هەتاوى و بەفرانبار ئازاد و حوکمە قورسەکانیان هەڵوەشێنێتەوە.
لەم بڕیارنامەیەدا لە بەرپرسانى کۆمارى ئیسلامى خوازراوە کە دڵنیایی بدەن لەوەى کە هیچ کەس لە ئێران ئازار و ئەزیەت نادرێت و یا تووشى سزا بێ بەزەیی و نائینسانی و یا سووکایەتیکەرەکان نابێتەوە و دڵنیایی دەدات کە هەموو دەنگۆکانى تایبەت بە ئازار و ئەشکەنجە بێ وەستان و بێ لایەنانە بەدواداچوونى بۆ بکرێت.
هەروەها شێلگیرانانى داوا لە کۆمارى ئیسلامى کراوە کۆتایی بهێنێت بە هەنگاوە بەربڵاو و سیستماتیکەکانى دەستبەسەرکردن و زیندانیکردنە خۆسەرییەکانى وەک گرتن و سەرگوومکردنى ناچارى و زیندانى تاکەکەسى لەمەڕ کەسانى هەڵگرى ڕەگەزنامەى دوو وڵات و بیانى و ئەوانەى خۆسەرانە دەستبەسەر کراون، ئازاد و لەمەڕ چارەنووس و شوێنى ئەو کەسانەى کە بە ناچارى سەرگوم کراون، ڕاپۆرتى ئاشکرا بدات بە دەستەوە.
