لە سنوری شاڕۆچکەی دووبز، چەند چەکدارێک دوو هاووڵاتی کوردیان بە ناوەکانی "فەهمی ساڵح" و "سەرحان محمد ساڵح" ڕفاند.
بە پێى ئەو هەواڵانەى کە دەست تۆڕی میدیایی ئاڤاتودەى گەیشتوون، هاووڵاتییەکى تەقتەق باسى لەوە کردووە کە چەکدارەکان سەر بە گرووپى تیرۆریستى دەوڵەتى ئیسلامى لە عێراق و شامن کە بە داعش ناسراوە، بەڵام خزمی یەکێک لە ڕفێندراوەکان بە ئاڤاتودەى گوت "پێش چەند ڕۆژێک دەمەقاڵێ دەکەوێتە نێوان بنەماڵی فەهمی ساڵح و سەرکردەیەکی حەشدی عەشائیری سوونە بەناوی ڕەعد ئەسوەد و ئەم سەرکردەى حەشد هەڕەشەیان لێ دەکات، هەر لە پاش چەند ڕۆژێک فەهمى و سەرحان دەڕفێندرێن"، دواى چەند ڕۆژێک فەهمی ساڵح بە کوژراوى دەبینرێتەوە و سەرحان محەمەدیش تا ئێستا چارەنووسى نادیارە.
شایەنى باسە پاش تێکشکانى داعش لە عێراق، جموجوڵەکانی چەکدارانی ئەم گرووپە تیرۆریستییە لە سنوری عێراق و سووریا دەستیان پێ کردووەتەوە، بەتایبەت لە ناوچە سونییەکان و شارەکانی موسڵ و کەرکوک و حەویجە. ماوەیەک بەر لە ئێستا ئەم چەکدارانە هێرشیان کردە سەر چەند گوندێکی سنووری حەویجە و موختارى گوندی محمودیەیان سەڕبڕی و دوا بەدوای ئەم ڕووداوەش هێزە ئەمنییەکانی عێڕاق دەستیان کرد بە پشکنینی باشووری ڕۆژئاوای کەرکوک و لە ئەنجام دا لە گوندی تەلهەلالە لە سنوری شارۆچکەی دووبز شەڕووپێدان لە نێوان هێزە ئەمنییەکانی عێراق و چەکدارانی داعش ڕووی دا کە بووە هۆی ئەوەى سێ چەکداری داعش کوژران و چەن ماتۆڕسکیلێک و چەک وتەقەمەنییەک دەستیان بەسەردا گیرا.
بە پێى زانیارییەکانى تۆڕى میدیایی ئاڤاتودەى، لە سنووری پاڕێزگای کەرکوک داعش لە هەوڵی خۆڕێکخستنەوەیە لەم سنوورە و ڕۆژانە کارو چالاکییەکانیان ئەنجام دەدەن و لە دوای نەمانی پێشمەرگەی کوردستان داعش دووبارە بووەتە مەترسی بۆ سەر دانیشتوانی ئەم ناوچانە.
