کۆڵبەرێکی گەنجی کورد لە ناوچە سنوورییەکانی شاری بانە لە ڕۆژهەڵاتی کوردستان، ڕۆژی سێشەممە بە تەقەی ڕاستەوخۆی هێزە سەربازییەکان گیانی لەدەستداوە.
بەپێی ڕاپۆرتی ڕێکخراوی مافی مرۆڤی هانا، ڕووداوەکە لە سنووری "شابدین" ڕوویداوە و تیایدا "خالد محەممەدی"ی تەمەن ٢٣ ساڵ، خەڵکی گوندی "نەجێنێ"ی سەر بە بانە، کراوەتە ئامانج. لە ڕاپۆرتەکەدا هاتووە کە هێزە سەربازییەکان "بەبێ هیچ ئاگادارکردنەوەیەکی پێشوەختە" تەقەیان لەو کۆڵبەرە کردووە.
هەمان سەرچاوە ئاماژەی بەوە کردووە، خالد محەممەدی دەستگیراندار بووە و بۆ دابینکردنی بژێوی ژیانی خێزانەکەی ڕووی لە کاری کۆڵبەری کردبوو، کە کارێکی مەترسیدارە و بە گواستنەوەی کاڵا بەسەر سنوورە سەختەکاندا ناسراوە.
تا کاتی ئامادەکردنی ئەم هەواڵە، تەرمی ناوبراو هێشتا لە نەخۆشخانەی بانە ڕاگیراوە و ڕادەستی خانەوادەکەی نەکراوەتەوە.
ساڵانە دەیان کەس لە کۆڵبەرەکان لە ناوچە سنوورییەکاندا بەهۆکاری جۆراوجۆر بریندار دەبن و گیانیان لەدەست دەدەن.
