بە پێی ڕاپۆرتی گۆڤاری فوربس لە نێوان ١٨ مارس هەتا ١٩ی مانگی مەی، ٦٠٠ ملیاردێری ئەمریکایی ٤٣٤ ملیارد دۆلار قازانجیان کردووە و بەو شێوە سامانەکەیان ١٥ لەسەد زیادی کردووە.
قەرەنتینەی هاووڵاتیان لە ماڵەکانیان و داخرانی ڕێستۆران و فرۆشگاکان لە سەردەمی بڵاو بوونەوەی کۆرۆنا بوو بە هۆی زیادبوونی لە ڕادەبەدەری کڕینی ئانلاین و بەو پێیە کۆمپانیاکانی چالاک لەو بوارەدا قازانجێکی زۆریان بەدەست هێنا.
هەروەها پێویستی بە ئینتەرنێت بۆ کاری لە دوور ڕا یان کەڵکوەرگرتن لە تۆڕە کۆمەڵایەتیەکان و سەرگەرمی دەبێ بەهۆی زیادبوونی سامانی خاوەن مڵکەکانی ئەو کۆمپانیاگەلە.
ئەو گۆڕانی شێوازی بەکارهێنانە بوو بە هۆی زیادبوونی پشکی ئامازۆن، فەیسبوک و بەشێوەی گشتی کۆمپانیاکانی بەشی تکنۆلۆژی.
بۆ وێنە سامانی جف بزوس سەرۆکی ئامازۆن لە نێوان مانگەکانی مارس هەتا مەی زیاتر لە ٣٠ لەسەد و سامانی مارک زاکربێرگ دامەزرێنەری فەیسبوک ٤٦ لەسەد زیادی کردووە. لە ١٦ مارسەوە و هاوکات لەگەڵ دەستپێبوونی قەرەنتینە لە ئەمریکا، بەهای پشکی فەیسبوک ٦٠ لەسەد، ئامازۆن ٤٥ لەسەد، نتفلیکس ٤٦ لەسەد و ئەپل ٣١ لەسەد زیادی کردووە.
زیادبوونی بەهای پشکەکان لەو کۆمپانیایانەدا بەردەوام لە زیاد بوون دایە. بەهای پشکی فەیسبوک و ئامازۆن لەو حەوتوویەدا گەیشتە بەرزترین ئاستی خۆی لە مێژووی ئەو کۆمپانیایانە.
لە بەرامبەردا ملیاردێرەکانی بەشی سەفەر، هۆتێلداری و وردەفرۆشی شایەتی کەمبوونەوەی سامانەکەیان لە کاتی کۆڕۆنا بوون.
