ناوەندی هاوکاریی حیزبەکانی ڕۆژهەڵاتى کوردستانی ئێران، سەبارەت بە کوشتنی کاسپکاران و سووتەمەنیبەرانی بەلووچ لە ناوچە سنوورییەکانى پارێزگاى سیستان و بەلوچستان ڕاگەیندراوێکیان بڵاو کردەوە و تیایادا کۆمەڵکوژییە نائیسنانییەکانى کۆمارى ئیسلامییان مەحکوم و پڕۆتستۆ کرد کە لە ڕێگەى هێزى ئینتزامییەکان و سوپاى تیرۆریستى پاسدارانەوە ئەنجامى دەدات و تا ئێستا دەیان کەس لە کاسپکاران و ژنان و منداڵان و پیرەکان بوونەتە قوربانى و ئێستاش ئەنتەرنێتى لەسەر داخستوون بۆ ئەوەى کۆمەڵگەى نێودەوڵەتى و ڕێکخراوەکانى مافى مرۆڤ ئاگادارى ئەو کارەسات و قڕکارییە نەبن کە ڕوو دەدات.
ئەمەش ڕاگەیێنراوى هێزە کوردییەکانى دژ بە کۆمارى ئیسلامییە لەسەر ئەو کۆمەڵکوژییە:
بەپێی سەرچاوەکانی هەواڵ بەداخەوە بەکرێگیراوانی بەناو سنوورپارێزی سپای پاسداران، ڕۆژی دووشەممە ٤ی ڕەشەمەی ٩٩ی هەتاوی، لە ناوچەی سنووری “بۆمپەشت”ی، سەراوان، تەقەیان لە کاسبکارانی بەلووچ کرد و لە ئاکامی تەقەی ئەو هێزانەدا ١٠ کەس کوژران و بە دەیان کەسیش بریندار بوون.
ئەوە یەکەمجار نییە بەکرێگیراوانی کۆماری ئیسلامیی ئێران، لەو جۆرە جینایەتانە دەکەن و ئێمە ڕۆژانە دەبینین کە لە ئاکامی جینایەتەکانی ڕێژیم لە کوردستان و کوشتاری کۆڵبەران و باقیی نەتەوەکانی دیکەی ئێران لە ناوچەکانی ئەو وڵاتە، کە بووەتە کاری هەموو ڕۆژێکی دەست و پێوەندییەکانی ئەو ڕێژیمە.
دۆخی تاڵ و ناخۆشی ناوچە و نەبوونی هەلی کار و سنووردارکردنەکان بۆ نەتەوە ژێردەست و زوڵم لێکراوەکانی ئێران بووەتە هۆی ئەوەی کە خەڵک هیچ دەرەتانێکیان نەبێ و بۆ بژێوی ژیانی ڕۆژانەیان ڕوو بکەنە سەر سنوورەکان و بۆ دابینکردنی نانی شەو گیانی خۆیان دەخەنە مەترسییەوە.
ناوەندی هاوکاریی حیزبەکانی کوردستانی ئێران، وێڕای مەحکوم کردنی ئەو جەنایەتە دژە مرۆڤییە، سەرەخۆشیی خۆی ئاراستەی بنەماڵەی قوربانیان و هیوای سڵامەتی بۆ برینداران، لەو باوەڕەدایە کە هۆکاری سەرەکیی هەمووی ئەو جینایەت و وێرانکارییانە، ڕێژیمی کۆماری ئیسلامیی ئێرانە و لەنێوبردنی ئەو ڕێژیمە تەنیا ڕێگایەکە کە لە پێش خەڵکی ئێراندایە.
