AvaToday caption
ئەمڕۆ یەکشەممە، عادل موکەڕەم، زیندانى سیاسى کورد کە لە زیندانى ورمێ دەستبەسەرە، دژى پێڕانەگەیشتن بە ماف و خواستەکانى، لەبەردەم دادوەرى چاودێرى زیندانەکە ئاگرى لە خۆى بەردا. ئێستا عادل بە هۆى ئاگرتێبەردانەکەوە، پێى ڕاستى زۆر سووتاوە و بۆیە براوە بۆ ناوەندى تەندرووستى زیندانەکە.
پێشتر عادل لەبەر پێڕانەگەیشتن بە ماف و خواستەکانى، دوو جاران دەستى دایە مانگرتن لە خواردن، بەڵام هەر جارەى بە بەڵێنى درۆى بەرپرسان مانگرتنەکەى شکاند و جارێکیش هەر لەسەر ئەمە لێوەکانى دوورییەوە و مانگى لە خواردن گرتەوە.
عادل موکەڕەم ئەندامى حیزبی دیموکراتى کوردستانى ئێران بوو و دواتر وازى لەم حیزبە هێنا و چووە تورکیە و لە تورکیە دیپۆرت کرایەوە و ئێستا لەبەر دوو هۆکار زیندانییە:
یەکەم: ئەندامبوون لە حیزبێکى کوردى دژى نیزام
دووەم: دەرچوون لە سنوورەکان بە نایاسایی
