ڕێکخراوی نێودەوڵەتی کۆچبەران کە سەر بە نەتەوە یەکگرتووەکانە ڕایگەیاندووە بەهۆی کرانەوەی سنوورەکانی تورکیە بەرەو یەکیەتی ئەوروپا زیاتر لە ١٣ هەزار کەس لە سنوورەکانی یونان گرفتار بوون و ژمارەیەکیان منداڵن. بە پێی ئەو ڕاپۆرتە زیاتر لە ١٣ هەزار پەنابەر لە سنووری ٢١٢ کیلۆمەتری یونان و تورکیە بەسەر دەبەن.
ئەو پەنابەرانە لە گرووپی ٣ هەزار کەسیدا کۆ بوونەوە و شەوێکی ساردیان لە سنوری نیوان تورکیە و یونان بەسەر بردووە. پلەی ساردی لە شەودا گەیشتووەتە سیفر و بایەکی تووندی هاتووە.
لادفو گویلاوا، یەکێک لە بەرپرسە پلەباڵاکانی ئەو ڕێکخراوە گووتی: ژمارەی ئەو پەنابەرانەی لە ڕێگەی شاری ئیدرنە بەرەو سنوورەکانی یونان ڕۆیشتوون. لە درێژایی ڕۆژی شەممەدا ژمارەی ئەو پەنابەرانە هەر زیاتر بووە و بە ڕێگەی جۆراوجۆر خۆیان گەیاندووەتە سنورەکانی یونان.
سولەیمان سویلو وەزیری ناوخۆی تورکیە بە بڵاوکردنەوەی تویتێک ڕایگەیاند هەتا نیوە شەوی ڕابردوو ٤٧ هەزار و ١١٣ پەنابەر لە ڕێگەی پارێزگای ئیدرنە چوونە نێو یەکیەتی ئەوروپا. لە پارێزگای ئیدرنە خاڵی سنوری نێوان تورکیە بۆ یونان و بولغارستان هەیە.
لە پێوەندی لەگەڵ قسەکانی سویلو دەبێ بگوترێت هیچ کام لە وڵاتانی یونان و بولغارستان هەواڵی لەو چەشنەیان لەمەر هاتنی ئەو ڕژیە زۆرە پەنابەرە لە یونانەوە بۆ وڵاتانەکانیان ڕانەگەیاندووە.
وڵاتانی ئوروپایی لەسەر ئەو باوەڕن کە نابێ جارێکی دیکە ڕووداوەکانی ساڵی ٢٠١٥ و ڕۆیشتنی شەپۆلی پەنابەران بۆ وڵاتەکانیان دووپاتە بێتەوە و بۆ ئەو مەبەستەش باس لەوە دەکەن هێزی زیاتر بۆ پاراستنی سنورەکانی یونان و بولغارستان بنێرن بۆ ئەوەی بە هیچ شێوەیەک ڕێگەی چوونی پەنابەران بۆ ئەو وڵاتانە نەبێت.
