بەیانی ئەمڕۆ دووشەممە دوکتور جەلال جەلالی زادە ناسراو بە ڕامان، توێژەر، نووسەر و چالاکی مەدەنی و خاوەن بڕوانامەی دکتۆرای زانستە سیاسییەکان لە شاری سەردەشت زۆر گوماناوی و بە هۆی جەڵتەی دڵ گیانی لە دەست دا.
خزم و کەسە نیزیکەکانی دکتۆر ڕامان باس لەوە دەکەن لە لایەن ئیتلاعاتی سەردەشتەوە ماوەیەکی زۆر بووە لە ژێر گوشار دابووە و بە بەردەوامی بانگی ئەو ناوەندە ئەمنیەتییە کراوە و لێپێچینەوەی لەگەڵ کراوە. یەکێک لە خزمە نزیکەکانی کە نەیویست ناوەکەی ئاشکرا بکرێت دەڵێ: ئیتلاعاتی سەردەشت دەرزی لێداوە و دوای چەند ڕۆژ بەهۆی ئەو دەرزیە تووشی جەڵتەی دڵ بووە و گیانی لە دەست داوە.
ڕامان حاجی زادە چەندین لێکۆڵینەوەی زانستی و ئاکادمیکی لەسەر پرسە کوردیەکان و مەعریفەی کوردی کردووە و بە بەردەوامی وتارەکانی لە گۆڤارەکانی ڕۆژهەڵاتی کوردستان چاپ وبڵاو بووەتەوە. حاجی زادە لە دوایین وتاری خۆیدا لە ژێر ناوی "دەستپێکێک لەسەر زەینی کوردی" بە شێوەیەکی ئاکادمیک و زانستی پرسی کورد و سۆسیۆلۆژی کوردی شەن کەو کردبوو.
پێویستە خەڵکی سەردەشت بە تایبەتی، کۆمەڵگەی ڕووناکبیری و کۆمەڵگەی مەدەنی ڕۆژهەڵاتی کوردستان بە هەستیاریەوە مامەڵە لەگەڵ تیرۆری دکتۆر حاجی زادە بکەن و نەهێڵن تیرۆری ئەو بیلمەتە کوردە ئاوا بە ئاسانی پەرەدەپۆش بکرێت.
بە بێدەنگی کردن لە بەرابەر تیرۆری هەڵکەوتووان و بژاردەکانمان لە لایەن ئیتلاعاتی کۆماری ئیسلامییەوە بێگومان ئیزنی ئەوە بە ڕژیم دەدەین بە تێچوویەکی کەم دەست لە چالاکان و بە گشتی کۆمەڵگەی ڕۆژهەڵات نەپارێزێت.
