زیاتر لە هەزار چالاکوانی مەدەنی بە واژۆکردنی بەیاننامەیەک خوازیاری هەڵوەشاندنەوەی حوکمی لەسێدارەدانی شەریفە محەممەدی، چالاکوانی مافی ژنان بوون.
لەم بەیاننامەیەدا هاتووە کە شەریفە محەممەدی پاش تێپەڕاندنی ٢٠ مانگ دەسبەسەرکران و ڕەوتێکی دادوەریی نادادپەروەرانە، بەهۆی چالاکییە ئاشتیخوازانەکانی، حوکمی لەسێدارەدانی بە سەردا سەپاوە کە بڕیارێکی دوور لە دادپەروەرییە و دەبێت بە زووترین کات ئازاد بکرێت.
نووسەرانی بەیاننامەکە بە ئاماژەدان بە ئەشکەنجەدانی ئەم بەندکراوە سیاسییە لە کاتی دانپێداناندا نووسیویانە: "ئەشکەنجەدەران بۆ وەرگرتنی دانپێدانانی زۆرەملێ، شەریفەیان خستووەتە ژێر ئەشکەنجە و هەڵسوکەوتی توندوتیژانەی وەک، لێدان لە سەر و دەموچاوی لەکاتێکدا کە چاویشیان بەستووە".
واژۆکەرانی بەیاننامەکە لە بەشێکی دیکەدا جەختیان کردووەتەوە کە شەریفە لەژێر مەترسیی لەسێدارەداندایە و داوایان کردووە کە ئەم حوکمە نادادپەروەرانەیە بەپەلە و بێ هیچ مەرجێک هەڵبوەشێتەوە و هەروەها خوازیاری ئەوە بوون کە لێکۆڵینەوەیەکی سەربەخۆ و بێلایەنانە سەبارەت بە توندوتیژی و ئەشکەنجەدانی ئەم بەندکراوە سیاسییە بخرێتە گەڕ و تاوانباران لە دادگایەکی دادپەروەرانەدا وڵامدەر بکرێن.
