لە ڕووداوێکی نامۆدا لە قوتابخانەیەکی کچانەی شاری مەڵگشای سەر بە پارێزگای ئیلام، سێ قوتابی هەستان بە ژەهراویکردنی چوار لە مامۆستاکانیان.
ڕووداوەکە ڕۆژی دووشەممە لە قوتابخانەی “سدیقەی تاهیرە” ڕوویداوە، کاتێک ئەو سێ قوتابییە ماددەیەکی ژەهراوی و نەناسراویان تێکەڵ بە خواردنەوەی چای مامۆستا و کارگێڕی قوتابخانەکە کردووە.
بەپێی زانیارییەکان، لە ئەنجامی ئەم کارەدا چوار مامۆستا ژەهراوی بوون. یەکێک لە مامۆستاکان بەهۆی خراپیی باری تەندروستییەوە گەیەندراوەتە نەخۆشخانە و لەژێر چاودێری پزیشکیدایە، بەڵام سێ مامۆستاکەی دیکە چارەسەری پێویستیان وەرگرتووە و دۆخیان جێگیرە.
فەرمانگەی پەروەردەی شاری مەڵگشای لە ڕاگەیەندراوێکدا ئاماژەی بەوە کردووە کە پاڵنەری قوتابییەکان لە پشت ئەم کارەوە تەنها “گاڵتە و هاروهاجی” بووە.
هەروەها جەخت کراوەتەوە کە لێکۆڵینەوەی ورد لەسەر ئەم ڕووداوە دەستی پێکردووە بۆ ئاشکراکردنی سەرجەم لایەنەکانی بابەتەکە.
