ئەمرۆ بۆریس جانسۆن بووە جێگرەوەى ترێزا مەى و بووە سەرۆکوەزیرانى بەریتانیا. بۆریس پەیوەندییەکی نزیکی لەگەڵ دۆناڵد ترامپى سەرکۆمارى ئەمریکا هەیە و چاوەڕوان دەکرێ لە سەردەمی سەرۆکوەزیرانی ناوبراودا پەیوەندی نێوان ئەمریکا و بەریتانیا بگاتە باشترین ئاست و لەو ڕووە هاتنە سەرکاری ناوبراو هەواڵێکی ناخۆشە بۆ دەسەڵاتدارانی کۆماری ئیسلامی.
بۆریس جانسۆن لەدایکبووی شاری نیۆیۆرکی ئەمریکایە و ٥٥ ساڵی تەمەنە و هەتا ساڵی ٢٠١٦ هەڵگری ناسنامەی ئەمریکایی ـ بەریتانیایی بووە، بەڵام لە ساڵی ٢٠١٦ بەولاوە خۆی لە هاووڵاتیبوونی ئەمریکا بێبەش کرد و خۆى بە تەنیایی بە بەریتانیایی لەقەڵەم دا.
جانسۆن، چالاکیی سیاسی و کۆمەڵایەتی خۆی لە ساڵی ٢٠٠١ى زایینى و لە سەردەمی چوونە نێو پەرلەمانی بەریتانیا دەست پێ کرد. لە سەرەتاوە لەگەڵ کۆنەپارێزەکان کاری کردووە و لە گرووپی پاڕى سیاسییەکانی ئەو وڵاتە، بە " لیبیرتاریەن" ناوزەد دەکرێت. جانسۆن لە مێژوونووسیدا دەستی هەیە و بۆرسیەیەکی خوێندنەوەی بەرهەمە کلاسیکییەکانی هەیە. بڕوانامەی بەکالۆریۆسى زانستگای ئاکسفۆردی بەریتانیای هەیە.
بابە گەورەی جانسۆن "عەلی کەمال" دوایین وەزیری ناوخۆی دەوڵەتی عوسمانی بووە کە لە دوای ڕووخانی ئیمپراتوری عوسمانی و بە هۆی ئەوەی بۆ ماوەیەک مسەتفا کەماڵی قۆڵبەست کردبوو لە تورکیە، هەڵاتبوو و بەرەو بەریتانیا ڕاى کردبوو.
بۆچوونەکانی جانسۆن هەمووکات بووە هۆی درووستبوونی کێشە. جانسۆن لەگەڵ ئەوەی دژی یاسای یاساغکردنی پۆششی ئیسلامی ژنانی موسڵمانی بەریتانیایە، لە هەمانکاتیشدا چەندین جار گاڵتەی بە حیجابی ژنانی موسڵمان کردووە و جلوبەرگى ژنانی موسڵمانی بە سندوقی پۆستە و دزانی ماسکدار شوبهاندووە.
پێی وایە ئیسلام، هۆکاری دواکەوتویی وڵاتانی موسڵمانە و چەندین جار ئەو قسانەی بووەتە هۆی درووستبوونی کێشە. جانسۆن لاینگری چوونەدەرەوەی بەریتانیایە لە یەکیەتی ئەوروپا و جێبەجێکردنى پڕۆژە یاسای "برگزیت"ـى لاپەسەندە. لە نێوان ساڵەکانی ٢٠٠٨ بۆ ٢٠١٦ى زایینى، شارەدارى شاری لەندەن بووە.
بۆریس جانسۆن، بە یەکێک لە دۆستە نزیکەکانى کورد هەژمار دەکرێت و لە سەردانیکردنى بۆ هەولێرى پایتەختى هەرێمى کوردستان، داڵخۆشى خۆى بەوە دەربڕی کە لە کوردستانە و خۆى بە یەکێک لە دۆستە هەرە نزیکەکانى گەلى کورد هەژمار کرد و تەنانەت لەبەر قەڵا و لە چایخانەى مەچکۆش دانیشت و چایی خواردەوە و کڵاوجامانەى خستە سەرى.
