مەولانا عەبدولحەمید، لە وتاری نوێژی هەینیی ئەمڕۆیدا بە وتەی پێغەمبەری ئیسلامی دەستی پێ کرد کە گووتوویەتی: ئەو کەسەی متمانە نەپارێزێت ئیمانی نییە، ئەو کەسەش ئەگەر پابەند نەبێت بە بەڵێنەکەیەوە، هیچ ئایینێکی نییە.
مەولانا ئاماژەکردن بە درۆزنی بەرپرسانی کۆماری ئاخوندی گوتی:
ئایینی ئیسلام ڕێگە بە هیچ کەسێک نادات درۆ بکات، بەرپرسان و حکومەتەکانی جیهان دەبێت ڕاستگۆ بن لەگەڵ گەلەکەیان. خراپترین حاکم حاکمێکە کە درۆ لەگەڵ گەلەکەی دەکات. کاتێک خەڵک، کەسێک وەک سەرکردە هەڵدەبژێرێت و متمانەی پێ دەکات و ئەویش درۆ لەگەڵ خەڵک و میللەت بکات، ئەمە خراپترین درۆیە. ڕاستگۆیی و حەقیقەت، ڕزگاربوونە و درۆ دەبێتە هۆی وێرانکاری و نەهامەتی، ئەمە خاڵێکە کە پێغەمبەر ئاماژەی پێ کردووە. ئیسلام فەرمانی کردووە کە نابێت خیانەت لە هیچ ئەمانەتێک بکرێت و لە قسەکردن پێویستە ڕاستگۆ بین.
هەندێک لە بەرپرسانی کۆماری ئاخوندی درێغی ناکەن لە درۆ و قسەی ساختە، بۆ نمونە بەرپرسێک (مەبەستی وەزیری دەرەوەی کۆماری ئاخوندییە) لە ڕۆژئاوا گووتی کەس لە ناڕەزایەتییەکان نەکوژراوە و کەسیش لە زیندان نییە. بەڕاستی سەرمان سوڕما کە چەندە بە ڕوونی درۆ دەکات، کەچی لە ڕاپەڕینەکان و ناڕەزایەتییەکان لەم دواییانەدا زۆرێک شەهید بوون و زۆریش لە زیندانن. هەر لەم مزگەوتەی زاهیدان، لە هەینی خوێناوی زاهیدان، چەندین نوێژخوێن شەهید بوون.
هیچ سیستەمێکی حکومەت و سەربازی مافی ئەوەی نییە بە پێچەوانەی حەقیقەتەوە قسە بکات، تەنانەت ئەگەر سیستەمێکی ئیسلامیش بێت و هیچ سیستەمێکی ئیسلامیش تا ڕۆژی قیامەت بەردەوام نابێت، تەنانەت سیستەمێکی دادپەروەریش تا ڕۆژی قیامەت بەردەوام نابێت. کەس ئەبەدی نییە، ئەوەی دەمێنێتەوە ڕاستگۆیی و خزمەتکردنی گەلە، هەموومان دەڕۆین.
لە کاتی ژەهراویکردنی قوتابخانەکانی کچانی ئەو وڵاتە، کچانی ئێرانیان کردە ئامانج و کێشەیان بۆ هەموو میللەت دروست کرد و ئەم ڕەوتە زۆر جددییە و دوای سێ مانگ بەسەر دەستپێکردنیدا، سەدان کچ ژەهراوی بوون. سەرەکیترین ئامانجی ئەم ڕەوت و هێرشانە کچانن.
جێگەی سەرسوڕمانە کە تا ئێستا پرسێکی وا گەورە چارەسەر نەکراوە و هۆکارەکان و ژەنجامدەرانی دیاری نەکراون، لەکاتێکدا حکومەت هەموو ئاسانکارییەکانی لەبەردەستدایە.
زۆر کەس پێیان وایە ئەمە جۆرێکە لە سەرکوتکردنی ناڕەزایەتییەکان و بە ژەهراویکردن کچانیان کردووەتە ئامانج.
