ڕۆژی سێشەممە ٢٦ی بانەمەڕی ١٤٠٢ی هەتاوی، نازیلا مەعرووفیان، ڕۆژنامەنووس و چالاکی ژنان لە تویتێکدا بە ئاماژەدان بە گوشارەکانی هێزەکانی ڕێژیم سەبارەت بە حیجابی زۆرەملێ لە زانکۆکان، نووسی: ٣٥ کەس لە خوێندکارانی زانکۆی زەهرا لە تاران بەهۆی لەبەرچاونەگرتنی حیجابی زۆرەملێ لە خوێندن هەڵپەسیردراون و ئیزنیان پێ نادرێت تا کۆتایی خوێندنی ئەمساڵ لە خابگاکانی زانکۆ کەڵک وەربگرن.
مەعرووفیان لە درێژەدا بە ئاماژەدان بە شۆڕشی ژینا لەژێر ناوی "ژن ژیان ئازادی"، نووسی: پاش دەستپێکی ئەو شۆڕشە و ناڕەزایەتی دەربڕین لە هەموو زانکۆکانی ئێران سەبارەت بە حیجابی زۆرەملێ، خوێندکارانی زانکۆی زەهرا، بەردەوام لەژێر گوشار و هەڕەشەی ناوەندە ئەمنییەتییەکانی ڕێژیمدان.
ناوبراو هەروەها نووسیشی کە حەراستی زانکۆ ئیزن نادات ئەو خوێندکارانەی کە حیجاب لەبەرچاو ناگرن بچنە زانکۆ و بەردەوام لەلایەن کۆمیتەی ئینزیباتی زانکۆ بانگیان دەکەن و لە ترمەکانی خوێندن هەڵیاندەپەسێرن.
بەپێی ڕاپۆرتی ئەو ڕۆژنامەنووسە، بەرپرسانی زانکۆ بە سەرپەرستیی "زەهرا نازم بکایی"، بەردەوام بۆ خوێندکارانی زانکۆ دۆسییەسازییان کردووە.
