لە وتارێکدا کە لە واڵ ستریت ژورناڵ بڵاو بووەتەوە، داوا لە ڕێبەرانی جیهان کراوە، تێچووی کارەکانی کۆماری ئیسلامی لە ڕووی ڕفاندن و تیرۆری دژبەران لە دەرەوەی وڵاتەکەی زیاد بکەن و وەک سیاسەتی تۆقاندنی کۆماری ئیسلامی بیناسێنن.
لەو وتارەدا کە ڕۆژی دووشەممە بڵاو کراوەتەوە هاتووە: ڕێبەرانی ئێران لە کاتی دامەزراندنی کۆماری ئیسلامییەوە لە خاکەلێوەی ١٣٥٨ بەملاوە دەستیان کردووە بە ڕاوەدونان و کووشتنی دژبەرانیان و بەردەوامن.
واڵ ستریت ژورناڵ بە ئاماژەکردنى شەپۆلی ئێعدامەکان لە دەیەی شەست و درێژەی ڕەوتی ڕفاندن و تیرۆری سیما دژبەرەکان لە دەیەکانی دواتردا، نووسیویەتی: کاتێک خامنەیی ساڵی ٦٨ بووە ڕێبەری ئێران، کۆمیتەیەکی تایبەتی بە ناوی کۆمیتەی کاروباری تایبەت پێک هێنا و لەسەر بنەمای پێشنیارەکانی، کۆمیتەکە دەستی کرد بە تیرۆرکردنی چالاکانی سیاسی و دژبەرانی ئەو ڕژیمە.
بە پێی ئەو ڕاپۆرتە، شاپوور بەختیار سەرۆکوەزیرانی حکومەتی پەهلەوی، گەلاوێژی ١٣٧٠ لە پاریس بە چەقۆ لێیدرا و دواتر خنکێنرا. بە لێدانی چەقۆ لە بۆن ـی ئاڵمان فەرەیدون فەروخزادیان کووشت. دوای چەند مانگ دوکتور سادق شەڕەفکەندی و چەند کەس لە دژبەرە کوردەکانی ئێران بە بڕياری ئەو کۆمیتەی تیرۆرە لە ڕستۆرانی میکۆنۆسی بێرلین کووژران.
