رۆژنامەی جیهانی سەنعەت ئەوڕۆ ٦ی خەزەڵوەڕ بڵاوی کردووەتەوە کێشەکانی کەرتی پیشەسازی ئێرانی بۆتە هۆی ئاوسان و داخستنی یەکەکانی پیشەسازی.
عەلیرەزا سەقیری شارەزای پیشەسازی دەڵێ "پەیکەری پیشەسازی ئێران بە برینی کۆنەوە گرفتارە و بەرپرسانی دەوڵەتی هیچکات کێشەکانی ئەو کەرتەیان بەهەند وەرنەگرتووە". هەڵبەز و دابەزی نرخی ئەرز، ئاوسانی ئابووری، قازانجی زۆری بانکی لە پەنا جێبەجێکردنی سەقەتی پڕۆژەی یارانەکان وایکردووە کەرتی پیشەسازی و بەرهەم هێنانی ئێران تووشی کێشەی گەورە ببێتەوە.
یاساکانی کۆماری ئیسلامی ڕێگرن لە گەشەی پیشەسازی
سەقیری لە بەشێکی دیکەی قسەکانیدا دەڵێ: یاسا و بۆرۆکراسی ئیداری بارودۆخی بۆ بەرهەمهێنەران و فرۆشیارانی ئەو کەرتە هەستیارە زۆر دژوار کردۆتەوە، تا ئەو جێگایەی کەس متمانەی بەو کەرتە نەماوە بۆ ئەوەی سەرمایەگوزاری و وەبەرهێنانی تێدا بکەن. ئەو کارناسەی بواری پیشەسازی بە ئاماژەدان بە گرانی و نەبوونی پێداویستی و پارچە جۆراوجۆرەکانی ئامێرە پێشەسازییەکان دەڵێ گەورەترین خەسار کە وەبەر ئەو کەرتە کەوتووە دەگەڕێتەوە بۆ ئەو دوو هۆکارە.
بە گووتەی سەقیری دەوڵەت لەگەڵ چالاکان و سەرمایەگوزارانی ئەو کەرتە یاری دەکات و قەرەبووی ئەو زەرەر و زیانانە ناکاتەوە کە وەبەر کەرتی پیشەسازی کەوتوون. شایانی باسە بە هۆی گەمارۆکانی ئەمریکا بۆ سەر ئێران زۆربەی جومگە ئابووری و ماڵییەکانی کۆماری ئێران تووشی قەیرانی قوڵ بوونەتەوە و کۆمپانیا و بانکە نێو دەوڵەتیەکان بە کۆمەڵ پێوەندیەکانی خۆیان لەگەڵ ئەو وڵاتە دەپسێنن.
وابڕیاڕە ١٣ی مانگی خەزەڵوەر گەمارۆکانی کەرتی نەوت لەسەر ئێران کە بە ستوونی فەقەراتی ئابوری ئێران دەناسرێتەوە بچێتە بواری جێبەجێکردنەوە و بەو کارە ئابووری ئێران لەمە زیاتر تووشی داڕمان دەبێتەوە. پشتیوانیکردن لە گرووپە تیرۆریستییەکان، دەستێوەردان لە کاروباری وڵاتان و هەوڵدان بۆ بەدەست هێنانی چەکی ناوەکی، پەرەدان بە گەڵاڵەی موشەکی و پێشیڵ کردنی مافەکانی مرۆڤ لە ئێراندا سەرەکیترین هۆکارەکانی گەمارۆکانی ئەمریکا و هاوپەیمانەکانی ئەو وڵاتەن بۆسەر کۆماری ئیسلامی.
