بە پێى هەواڵى گەیشتوو لە نێوخۆى وڵاتەوە بە تۆڕی میدیایی ئاڤاتودەى، "ئەمڕۆ ١٤/٧/٩٧ى هەتاوى بە هەموو سەرپەرشتیارانى بەشەکانى نەخۆشخانەکانى هەموو ئێران وتراوە کە ئاگادارى هەموو کەلوپەلە دەرمانییەکانیان بن و هیچ دەرمانێکى زیادە نەدەنە کەس و ئاگایان لە کەم دەرمانى بێت".
ئاڤاتودەى پەیوەندى بە دکتۆرێکەوە کرد لە تارانى پایتەختى ئێران و سەرەڕاى پشتڕاستکردنەوەى ئەو هەواڵە باسیشى لەوە کرد کە "نەک تەنیا هۆشدارى کەمى دەرمان دراوە، بەڵکو خواردنى بەیانیانى ئەو کەسانەى کە شیفتى شەوان کاریان دەکرد لا براوە و دۆخەکە هێندە خراپە کە هەموو بودجەى دابینکراوى یەک ساڵى نەخۆشخانەکان بۆ دڵنیایی کۆمەڵایەتى لەم شەش مانگ و سێزدە ڕۆژەدە هەمووى تەواو بووە و ئێستا ئیتر پارەیەک نەماوەتەوە بۆ بەردەوامبوون".
پێشووتر وەزیرى تەندرووستى لە تەلەفزیۆندا باسى لەوە کردبوو کە "ناکرێت ئێمە لە خەمى هەم دەرز و هەم دەرمانى خەڵکى ئاساییدا بین و هەم دەرمان بۆ ئەو کەسانە دابین بکەین کە دوو ساڵێک دەژین"، مەبەستى ئەم وەزیرە ئەو نەخۆشانەى "ئێس.ئێم.ئاى" بوو کە ئەگەرى زیندوومانەوەیان زۆر کەمە و ددانى بەوەدا نا "باشترە دەرمان و دەرزى بۆ کەسانى ئاسایی دابین بکەن نەوەک ئەو کەسانەى کە چەند ساڵێک کەمتر دەژین".
کەمبوونەوە و مایەپووچبوونى بەهاى تمەن بەرامبەر دۆلار هۆکارى سەرەکییە لە کەمهێنانى بودجەو خراپبوونى دۆخى وڵات.
ڤیدیۆى قسەکانى وەزیرى تەندرووستى کە بە خراپە باسى ئەو نەخۆشانەى کرد کە بێ چارەن!
