بە پێى هەواڵى گەیشتوو لە فرۆشیارانى ڕۆژهەڵاتى کوردستان و شارەکانى دیکەى ئێرانەوە، مانگرتنى شۆفێرانى ئۆتۆمبێلە بارهەڵگرەکان کاریگەرییەکى گەورەى نەرێنى لەسەر بازاڕى تەواوى ئێران داناوە و بەمەیش هەتا دێت ناڕەزایەتییەکان زیاتر بەرز دەبنەوە و خەڵکى زیاتر تووڕە دەبن.
فرۆشیارێکى ئاسن لە شارى کرماشانەوە بە تۆڕى میدیایی ئاڤاتودەى گوت "من ئاسنفرۆشیم لە شارى کرماشان هەیە و خەریکە ئاسنقڕان دەکەوێتە نێو شارەکەمانەوە و ئەگەر ئەم مانگرتنەى کامیۆنداران بەردەوام بێت، ئەوا زۆرێک لەوانەى کە تووڕە دەبن و ناڕازین، ئەو کەسانەن کە خانوو دروست دەکەن و بێ خانوو و کەسانى هەژارن و بەمەیش هەر ئەوانن دەڕژێنە نێو شەقامەکانەوە".
یەکێک لە فرۆشیارانى بەکۆمەڵى (جوملە) دایبی و پووشاکى منداڵان بە ئاڤاتودەى گوت "ئێستا خەڵکى لە دواى کەرەستەى خۆراکى هەندێک کەلوپەلى دیکەى دەوێت کە گرنگن بۆ بنەماڵە، بەتایبەت پووشاک و بە هۆى کەمى پووشاکەوە لە ئێران خەریکە خەڵکى هێندەى دیکە هەم بەرامبەر شکستى ئابوورى کۆمارى ئیسلامى هۆشیار دەبنەوە و هەم هیوا بەوە خۆش دەکەن کە نیزام دەڕووخێت".
ئاسنفرۆشەکەى کرماشان باسى لەوە کرد کە خۆى و هاوکارەکانى بەلانى کەمەوە ملیارێک تمەنیان ڕژاندووەتە نێو هەژمارى کارگەکانى وەبەرهێنانى ئاسنەوە، بەڵام تا ئێستا بەدەستیان نەگەیشتووە و "ئێستا هەموو پارەکانمان دەوێتەوە و کارگەکانیش گوێى خۆیان خەواندووە".
ئابووری ناسێکیش ئەمەى بە هۆى ئەو بەرزبوونەوە و دابەزینى بەهاى دۆلارە گەڕاندەوە و ئیتر کەس نە تاقەتى مامەڵەى گەورەى هەیە و نە کەس دەشوێرێت کەلوپەلەکانى بفرۆشێت.
وێنەکان بەڵگەى ئەو پارە زۆرانەن کە ڕژاونەتە هەژمارى بانکى کارگەکانى ئاسنەوە کەچى ئێستا کارگەکان نە ئاسنیان بۆ دەنێرن و نە پارەکەشیان دەدەنەوە!
وێنەى یەکەم: پارەى مووشتەرییەکان کە دراوە بە کارگەى ئاسن
وێنەى دووەم: پارەى مووشتەرییەکان کە دراوە بە کارگەى ئاسن
وێنەى سێیەم: پارەى مووشتەرییەکان کە دراوە بە کارگەى ئاسن
