ڕۆژنامەى "دنیاى اقتصاد"، ئەم پێنج شەممەیەى ڕابردوو ڕاپۆرتێکى لەژێر ناوى "هەڵاوسان لە ٣١ پارێزگاى ئێران" بڵاو کردەوە کە نیشاندەرى شکستى گەورەى کۆمارى ئیسلامى و مایەپووچى ئەو ڕژێمەیە بە هۆى ئەو گەمارۆیانەى کە ئەمریکا بە هۆى پاڵشتى دەسەڵات لە تیرۆریستەکان خستوویەتییە سەری.
"دنیاى اقتصاد" نووسیویەتى:
لە هاوینى پارەکەوە تا هاوینى ئەمساڵ، ڕەنگ و بۆى هەڵاوسان لە جوگرافیاى وڵات گۆڕانکارییەکى بەرچاوى بە خۆیەوە گرتووە. لەسەر بنەماى زانیارییەکانى ناوەندى ئامار، پارێزگاى سنە بە تۆمارى ١٢ بەهاى هەڵاوسان ٥٠.٨%ی، لە لووتکەى هەڵاوسانى ئێران لە مانگى گەلاوێژ جێى گرتووە.
لە کاتێکدا لە مانگى هاوشێوەى ساڵى ڕابردوو، لووتکەى هەڵاوسان لە ٣٨% کەمتر بووە و ئەو لوتکەى هەڵاوسانەش کرماشان بووە. لەگەڵ ئەمەشدا، قوربانیانى سەرەکى ناجێگیرى ئابوورى لە ماوەى ساڵى ڕابردوو، دانیشتووانى پارێزگای سنە، چوارمەحاڵى بەختیارى، ئیلام، خوراسانى باکوور و باشوور، سیستان و بەلوچستان، بوشێهر و کەهگیلویە و بویرئەحمەد بوونە کە بە پێى دواهەمین ئامار، ڕووبەڕووى هەڵاوسانى نزیک بە ٥٠% بوونەتەوە و لە هێڵ و دۆخی سووردان.
لە ڕاستیدا مەحروومترین و بێبەشترین پارێزگاى ئێران زۆرترین گورزیان لەم هەڵاوسانە بەر کەوتووە. جێگەى سەرنجە کە لە گەلاوێژى پارەکە کە هەڵاوسان تەک ژمارەیەى بووە، سیستان و بەلوچستان و بوشێهر، لە ڕووى ئابوورییەوە دۆخێکى جێگیریان هەبووە.
خاڵێکى دیکە کە بەرچاو دەکەوێت، قووڵى و جیاوازى هەڵاوسانە لە نێو پارێزگاکان. لە ساڵى ڕابردوو، جیاوازى لووتکە لەگەڵ کەمترین خاڵى هەڵاوسان، لە نێوان پارێزگاکان لە ٣٠% بۆ ٥% بووە، کەچى لەم ساڵەدا، ٥٠% بۆ ١٥%ـیە کە ئەمەش نیشانەى ڕاستەوخۆى مایەپووچى ئابوورى ئێران و شکستى کۆمارى ئیسلامىییە.
ئابووریناسان پێشبینى ئەوەش دەکەن کە بەم شێوەیە بچێتە پێشەوە و گەمارۆ لەسەر گەمارۆ لە لایەن ئەمریکاوە بخرێتە سەر ڕژێم، ئەوا ڕێژەى هەڵاوسان زیاتر و زیاتر دەبێت.
