ئەنجوومەنی ئاسایشی نەتەوە یەکگرتووەکان وێرای ئیدانەکردنی هێرشی سەر نەوتهەڵگرەکان لە دەریای عومان، ئەو ڕووداوەی بە مەترسییەکی جدی بۆسەر ئەمنیەتی ناوچەکە ناوبرد.
لە دانیشتنی ئەنجوومەنی ئاسایش کە لە پشت دەرگا داخراوەکان و شەوی رابردوو بەڕێوە چوو، لە ڕاگەیەندراوی کۆتاییدا داوا لە لایەنەکان کراوە، هێمن بن و هەروەها ئەو هێرشانەی بە هەڕەشەیەکی گەورە لەسەر هاتوچۆی ئازادانەی کەشتی و دابینکردنی وزەی جیهان نێوزەد کرد.
لەو دانیشتنەدا، جاناتان کۆهێن، سەرپەرشتی نوێنەرانی ئەمریکا لە نەتەوە یەکگرتووەکان کۆمەڵێک بەڵگەی لەمەڕ ئەو هێرشە و دەستێدابوونی ئێران تێیدا بڵاو کردەوە. ئەمریکا، ئێران بە بەرپرسی ئەو هێرشە دەزانێ و لەو پەیوەندییەدا وەزارەتی بەرگری ئەمریکا فیلمێکی بڵاو کردووەتەوە کە نیشانی دەدات پاپۆڕێکی سوپای پاسداران پاشماوەی مینێک کە نەتەقیبووە ، لە یەکێک لەو کەشتیانەی کە هێرشی کردبووە سەر بڵاو دەکاتەوە.
پێشتر برایان هۆک، نوێنەری تایبەتی ئەمریکا بۆ کاروباری ئێران ڕووبە کۆمیتەی لاوەکی کاروباری دەرەوەی مەجلیسی نوێنەرانی ئەمریکا گووتبوی: ناوەندە سیخوڕییەکانی ئەمریکا پشتڕاستی دەکەنەوە کە پاپۆرە ئێرانییەکان لە گەرووی هورمز و لە ڕۆژانی ١٢ و ١٣ مانگی ژوئەن لە نەوتهەڵگرێکی نۆروێژی بە ناوی "فرانت ئاڵت ئایر" و نەوتهەڵگرێکی ژاپۆنی بە ناوی " کوکوکا کوریجس" نیزیک بوونەوە.
بە گووتەی سەرچاوە ئیتلاعاتییەکانی ئەمریکا نیزیک بوونەوەی پاپۆرەکانی وڵاتى ئێران لەو کەشتیانە پێش لە ڕوودانی تەقینەوە لە نەوتهەڵگرەکاندا بووە.
