٢٤ کەس لە خوزستان لە لایەن هێزەکانی کۆماری ئیسلامی لە خوزستان بە تاوانی بڵاوکردنەوەی هەواڵی ناڕاست و ئاڕمانجدار لە لافای ئەو شارە قۆڵبەست کران.
لە کاتێکدا خەڵکی لافاولێدراوی خوزستان لە ناوچە جیاوازەکانی ئێران لەمەڕ خاو بوونی بڵاوکردنەوەی زانیاری و ئەو کارەساتەی تووشی خەڵکی لافاودیتوو بووەتەوە ناڕازین، پۆلیسی فەتا لە خوزستان ٢٤ کەسی لەمەڕ بڵاوکردنەوەی هەواڵ لەسەر لافاو و ئاسەوارەکانی لافاو بە تاوانی بڵاوکردنەوەی هەواڵی ناڕاست و دەنگۆ کە بە گووتەی ئەو دەزگایە دەبێتە هۆی ئاڵۆزبوونی بیروڕای گشتی، قۆڵبەست کرد.
پێشتر دادوەری گشتی خوزستان بڵاوی کردبووەوە کەسێک کە کلیپێکی لەسەر بەنداوی کەرخە و بڵاوبوونەوەی دەنگێکی سەیر لێی بڵاو کردبووە، قۆڵبەست کردووە. ئەو هەوڵانەی دەزگایی دادوەرى کۆمارى ئیسلامى لە کاتێکدایە کە ڕژێم لەسەرەتای دەستپێبوونی لافاوەکان تا ئێستا تایبەت بە شێوازی بەهاناوەچوونی خەلک و بڵاوکردنەوەی هەواڵی تایبەت بە ناوچە لافاولێدراوەکان، لەگەڵ ڕەخنەیەکى زۆر ڕووبەڕوو بووەتەوە.
