لوتفوڵا دژکام پێشنوێژی نوێژی هەینی شیراز لە نمایشی هەینی ئەو شارە بە ئاماژەدان بە هاتنی لافاو لە شوێنی جیاجیای ئێران گووتی بڵاوکردنەوەی هەواڵ لەسەر لافاو و و زانیاری درۆ دەبێتە هۆی فیتنە.
دژکام هیچ ڕوونکردنەوەیەکی لەسەر ئەو میدیایە نەدا کە مەبەستیەتی و هەواڵەکانی دەبێتە هۆی فیتنە بەڵام گووتی ئەو میدیایەی فەزا بۆ میدیای بێگانە بکاتەوە لە تاقیکاریدا سەرکەوتوو نەبووە. ئەوە بۆ جاری چەندەمە لە ڕۆژانی ڕابڕدوو و دوای هاتنی لافاو لە هێندێک ناوچەی ئێران کە هۆشداری دەدرێت لەمەڕ بڵاوکردنەوەی زانیاری سەبارەت بە کارەساتی لافاو لە ئێران.
پێشتر محەمەد جەعفەر مونتەزیری دادوەری گشتی ئێران و جەواد جاوید نیا جێگری دادوەری گشتی ئێران هۆشداری هاوشێوەیان دابوو. جێگری دادوەری گشتی ئێران بۆ کاروباری تۆرە کۆمەڵایەتییەکان گووتبووی ڕووبەڕووی ئەو کەسانە دەبینەوە هەواڵی ناڕاست بڵاو دەکەنەوە.
شایانی باسە ڕێکخراوی هاریکاری و ڕزگارکردنی هیلالی ئەحمەری ئێران ڕۆژی هەینی ٩ خاکەلێوە ئاماری کوژراوانی لافاوی لە ئێران ٤٥ کەس ڕاگەیاند بوو و هەروەها زیاتر لە ٣٠٠ کەس بریندار بوون.
