دوابەدوای بڕیاڕی خەڵک و چالاکوانانی شاری سنە بۆ دەربڕینى ناڕەزایەتی بەرامبەر لەسێدارەدانى ڕامین حوسەین پەناهى لە پارکى ئیسقلالى شارەکە، زیاتر لە ١٠٠ کەس لە هێزە ئەمنییەکان بە جلى فەرمییەوە و دەیان لیباس شەخسى لە نێو و دەوروبەرى پارکەکەدا بڵاوەیان پێ کراوە بۆ ئەوەى بەر لە کۆبوونەوەى خەڵک بگرن.
بە پێی گوتەی سەرچاوەکانی ئاڤاتودەی لە نێو شاری سنە، هێزە لیباس شەخسییەکانی کۆماری ئیسلامی جگە لە نێو پارکەکە، بە نیو شاریشدا بڵاوەیان پێ کراوە تا هەر کەسێک کە لەو بارەوە چالاکییەک بنوێنێت دەستگیر یا شناسایی بکەن.
ماتۆڕسوارە باتۆم بەدەستەکانیش لە نێو پارکی ئیستقلال جێگیر کراون و تا ئێستاش ئەو هیزە هەر لەوێ ماونەتەوە، خاتوونێکى چالاکڤان کە ناوەکەى لاى ئاڤاتودەى پارێزراوە، لە نێو پارکەکەوە گوتى "خەڵکى ترسیان لە شناسایی هەیە، هەرچەندە چاونەترسانە هاتوونەتە نێو پارکەکەوە، بەڵام هێزە ئەمنییەکان زۆرن".
