بەهای دراوی نیشتمانیی ئێران لە بازاڕەکاندا نزمترین ئاستی مێژوویی خۆی تۆمارکرد و نرخی هەر دۆلارێکی ئەمریکی بەربەستی ١٣١ هەزار تمەنی تێپەڕاند؛ ئەوەش ئاماژەیە بۆ قووڵبوونەوەی قەیرانی ئابووری لەو وڵاتەدا کە رووبەڕووی گوشاری سیاسی و گەمارۆی نێودەوڵەتی بووەتەوە.
رۆژی دووشەممە، لە بازاڕی ئازادی دراو لە تاران، دۆلار بەردەوامبوو لە بەرزبوونەوە و بۆ یەکەمجار گەیشتە ١٣١ هەزار و ٢٠٠ تمەن. ئەم بازدە گەورەیەی بەهای دۆلار هاوکاتە لەگەڵ بەرزبوونەوەی نرخی دراوەکانی دیکەش، بەجۆرێک نرخی هەر یۆرۆیەک لە بازاڕەکاندا گەیشتووەتە نزیکەی ١٥٤ هەزار تمەن.
چاودێرانی ئابووری دەڵێن، شکاندنی بەربەستی ١٣٠ هەزار تمەن، تەنیا ژمارەیەک نییە، بەڵکو بەربەستێکی دەروونیی گرنگ بوو کە شکانی دەبێتە هۆی ئەوەی متمانەی گشتی بە دراوی نیشتمانی زیاتر لەق بێت و خەڵک بۆ پاراستنی سەرمایەکانیان روو لە کڕینی دراوی بیانی و زێڕ بکەن.
کاریگەرییەکان لەسەر ژیانی خەڵک
ئەم هەڵاوسانە لە بەهای دۆلاردا، کە پێوەرێکی سەرەکییە بۆ دیاریکردنی نرخی کاڵاکان لە ئێران، مەترسیی دروستبوونی شەپۆلێکی نوێی گرانیی خستووەتە روو. بەرزبوونەوەی نرخی دراوە بیانییەکان راستەوخۆ کاریگەریی لەسەر نرخی خۆراک، دەرمان، پارچەی یەدەگ و کەرەستە سەرەتاییەکانی پیشەسازی داناوە.
پێشتریش هۆشداری درابوو کە بەردەوامیی ئەم دۆخە رەنگە وڵات بەرەو "قەیرانی خۆراک" ببات، بەتایبەتی کە دەسەڵاتداران توانای دابینکردنی دراوی پێویستیان بۆ هاوردەکردنی کاڵا ستراتیژییەکان کەم بووەتەوە.
رەوتی دابەزین
بەراورد بە حەوت ساڵ لەمەوبەر، کاتێک ئەمریکا لە رێککەوتنی ئەتۆمی کشایەوە، بەهای تمەن دەیان هێندە دابەزیوە. لەو کاتەدا نرخی دۆلار لە دەوروبەری 5000 تمەن بوو، بەڵام ئێستا بە تێپەڕاندنی ١٣١ هەزار تمەن، ئابووریی ئێران چووەتە قۆناخێکی نادیارەوە کە رەنگە کۆنتڕۆڵکردنی بۆ حکومەت زۆر ئەستەم بێت.
