ماوەیەکە بەربەستە ئاسنینەکانى جادەى مەهاباد بەرەو سەردەشت و جادەکانى پەسوێ و ڕێگەى زۆرێک لە گوندەکان، دەدزرێت و دەفرۆشرێت و ئیتر ئەم کارەش لە حاڵەتەوە دەرچووە و وەک دیاردەیەکى لێ هاتووە.
بە پێى قسەى سەرۆکى ڕێگەوبان و گواستنەوەى مەهاباد، لە ساڵى ڕابردوو ١٣ ملیار ڕیاڵ بەربەستە ئاسنینەکانى جادەى ئەم شارە دزراوە و باسى لەوە کردووە کە "لە ساڵى ڕابردوو بە کۆشى گشتى ٦٥٠ کۆڵەگەى بەربەستەکە و ٢٧٢ تابلۆى هۆشدارى و سیستەمى ڕووناکى دزراوە و فرۆشراوەتەوە بە ئاسنفرۆشەکان.
وەک بە تۆڕى میدیایی ئاڤاتودەى گوترا کە خودى سوپاش دەستى لەم دزی و تاڵانە هەیە، "دەنا چۆن بە بوونى شوێنى چاودێرى و بازگە و کەمینى سوپاى پاسداران لە دەیان شوێنى جادە و ڕێگەو بانەکان وا بە ئاسانى ئەم ئاسنانە دەدزرێن و کەسیش وەڵامگۆ نییە؟!"
نەویدی نیا سەرۆکى ڕێگەوبان و گواستنەوەى مەهاباد باسى لەوەش کردووە کە لە ساڵى ڕابردوو و بەو هەموو دزییەى کە کراوە تەنیا یەک کەس لە لایەن هێزە ئینتزامییەکانەوە دەستبەسەر کراوە کە ئەویش بە ساڵێک زیندانی و ٥٠٠ ملیۆن تمەن سزا دراوە.
کەناڵی هاژە بڵاوى کردووەتەوە کە مەهاباد خاوەن هەزار کیلۆمەتر جادە و ٢٣٥ کیلۆمەتر جادەى سەرەکى و لاوەکى و ٧٠٠ کیلۆمەترى جادەى گوندییە و دانانى هەر کیلۆمەترێک کۆڵگەکەى ئاسن و دانانى لەمپەرى ئاسنین نزیکەى ٨ ملیار ڕیاڵى تێ دەچێت.
