مانگێک پاش گرتنی ئەکبەر تەبەری یاریدەدەری سادق لاریجانی لە بەرێوەبەرایەتیی دەسەڵاتى دادوەرى، دەنگ و ڕەنگى کۆمارى ئیسلامى هەتا دێت زیاتر ئەم بابەتە دەورووژێنێت و قسەى لەسەر دەکات.
محەمەد یەزدی ئەندامی شووراى نیگەهبانى کۆمارى ئیسلامى و یاری نزیکی ئایەتۆڵا خامنەیی هێرشێکی توندی کردە سەر سادق لاریجانی، و لەم چوارچێوەیەشدا ئیبراهیم ڕەئیسی سەرۆکى دەسەڵاتى دادوەرى ڕژێم پاڵپشتى قسەکانى محەمەد یەزدى دەکات و دژى لاریجانى دەوەستێتەوە.
لە ڕووداوێکی کەم وێنەدا و لە دەنگ و ڕەنگى ڕژێم، سێ جار هێرش کرایە سەر لاریجانی بە تۆمەتی گەندەڵی و داگیرکردنی زەویوزار و درووستکردنی ناوەندى عیلمیەی هاوشێوەى کۆشک و تێچوون و خەرجییەکى بێ هەژمار و...
سادق لاریجانی لە وەڵامی ئەم هێرشانە سەڕەرای قبووڵنەکردنی تۆمەتەکانی، هەڕەشەى ئەوە دەکات ئێران جێ دەهێڵێت و دەچێتە نەجەفى عێراق، ئەو شوێنەى کە بە زێد و مەوتەنى خۆى هەژماری دەکات، چونکە لەوێ لەدایک بووە.
ئەم هێرشانە کاتێک گرنگتر دەردەکەون کە بەپێ یاسای ئێران، شووراى نیگەهبانى کۆمارى ئیسلامی و سەرۆکى دەسەڵاتى دادوەرى و دەنگ و ڕەنگ، هەرسێکیان لە ژێر چاودێری ڕاستەوخۆی ڕێبەرى کۆمارى ئیسلامیدان، ئەمەش بە ماناى ئەوە دێت کە ئەم شەڕە، شەڕى خامنەییە لەگەڵ بنەماڵەی لاریجانییەکان!
