کۆمارى ئیسلامى بۆ ئەوەى دەنگى ئۆپۆزسیۆن و کاناڵە تێلێگرامی و تۆڕە کۆمەڵایەتییەکانى دیکە نەگاتە نێو خۆى ئێران و بە پێچەوانەوە دەنگى خەڵکى ناڕازى و وەزاڵەهاتووى ئێران نەگاتە دونیاى دەرەوە، دەستى داوەتە سانسۆڕ و پێشگرتنێکى گەورەى ئەو تۆڕە کۆمەڵایەتى و کاناڵە تەلەفزیۆنیانەى کە لە ڕێگەى سەتەلایتەوە پەخشەکانیان ڕوو لە ئێرانە.
ئاراستەکردنى خەڵک زۆر گرنگە، بۆیە ئێستا تۆڕە کۆمەڵایەتییەکان و کاناڵە ئاسمانییەکانى کەسان و ناوەند و حزبە ئۆپۆزسیۆنەکان باشترین سەرچاوە و ڕێنوێنیکەرى خەڵکن بۆ ئەوەى بتوانرێت ئاراستە بکرێن بۆ شۆڕشێکى سەرتاسەرى و ڕووخانى کۆمارى ئیسلامى، هەر بۆیە ئەنتەرنێت لە ئێران لاواز و یا پچڕێنراوە و هەروەها تەشویش و سانسۆڕى خستووەتە سەر کەناتڵە سەتەلایەتییەکانى دەرەوەى ئێران.
شایەنى باسە بە دەستپێکى ئەو ناڕەزایەتییانە، دەزگا ئەمنییەکانى کۆمارى ئیسلامى دەستیان کردووە بە کۆکردنەوەى دەزگا و سێڵ و دیشى سەتەلایەتەکانى خەڵکى بۆ ئەوەى نەتوانن پەیام لە کەناڵە تەلەفزیۆنییەکانى دژ بە ئێران وەبگرن.
