سەرچاوەیەکى ئاڤاتودی لە واشنتۆنەوە گوتى "پەیامە سەربازییەکەى ئەمەریکا و هاوپەیمانەکانى لە سوریە بۆ کۆمارى ئیسلامى ئێران زۆر ڕوون بوو. تاران نابێت هەڵەى هەژمارنەکراو بکات و سەرۆک ترامپ لەگەڵ ئۆباما بەراورد بکات. مانگى ئایندەى زایینى، سەرۆککۆمارى ئەمەریکا دەبێت بڕیار لەسەر بەرجام (ڕێککەوتنە ئەتۆمییەکەى ئێران) بدات. واشنتۆن لە ڕێگەى دۆستە هاوبەشەکانیەوە، خواستە دیاریکراوەکانى خۆى و نیگەرانى هاوپەیمانەکانى ناوچەى بە تاران گەیاندووە و ئەگەر بێت و ئەم خواستانە لەلایەن کۆمارى ئیسلامى ئێرانەوە قبوڵ نەکرێت، دۆخى نەخوازراو دروست دەبێت".
دەرفەتى ڕابەرى کۆمارى ئیسلامى ئێران زۆر نییە و لەم چەند حەوتوویەى کە ماوە دەبێت وەرسووڕانێکى تەواو لە سیاسەتى خۆی لە ناوچەکەدا نیشان بدات. دەبێت تاقیکردنەوەى سارووخى خۆى ڕاگرێت و واز لە پێدانى چەک بە حوسییەکان بهێنێت و هێزەکانى لە سوریە و عێراق بباتە دەرەوە و واز لە دەستتێوەردانیان بهێنێت و دۆخى مافى مرۆڤ لە ئێران باشتر بکات، دەنا سەرۆک ترامپ بێ ئەملا و ئەولا توندترین بڕیار دژ بە کۆمارى ئیسلامى ئێران دەدات.
لە هەنگاوە یەکەم، کۆمارى ئیسلامى باش ڕەفتارى کرد و زۆرینەى فەرماندە باڵاکانى سوپاى قودسى لە سوریە بردە دەرەوە و هیچ کاردانەوەیەکى کردەیی دژ بە هێرشەکە نیشان نەدا و ئەمە بە پەیامێکى ئەرێنى هەژمار دەکرێت، بەڵام واشنتۆن و لە سەرووى هەمووشیانەوە جان بۆڵتنى ڕاوێژکارى ئاسایشى نەتەوەیی کۆشکى سپى هەنگاوەکانی دواترى ڕێژیمى کۆماری ئیسلامى بە وردى دەخاتە بن چاودێرییەوە.
هێشتا دەرفەت بۆ ئێران ماوە.
