ئەمڕۆ دووشەممە ٢٥ی جۆزەردان ، ئەنجومەنی سەوزی چیای مەریوان لەسەر ئەو هەڕەشانەی سەبارەت بە هەوڵە ژینگەپارێزیەکانیان لێیان دەکرێ ڕاگەیەندراوێکی بڵاو کردەوە و تێیدا باسی لەوە کردووە: تاڵانچییانی ژینگەی ڕۆژهەڵاتی کوردستان لەوپەڕی بێ ئەدەبیدا بە بیانووی ئەوەی ئەندامانی سەوزی چیا باخەکانیان دەبڕنەوە و گوزارشیان لێ دەدەن دەستیان کردووە بە بێحورمەتی بە ئەندامانی ئەنجومەنەکە.
ئەمەش دەقی ڕاگەیەندراوی ئەنجومەنی سەوزی چیا:
بێ حەیایی باوە ئەمڕۆ قوڕ بەسەر داکا حەیا
کەندەڵان سەربەرز و شادە، خۆی بشارێتۆ چیا
گوڵ ئەگەر ئەقڵی ببێ قەت سەر لە خاک ناکاتە دەر
چونکە ڕۆژی دڕک و داڵە و گەرمیی بازاڕی گیا
نیشتمان دۆستانی ڕاستەقینە، ژینگەپارێزانی وڵات، هۆگرانی سروشتی خاوێن!
هەروەک ئاگادارن چەن ساڵێکە شەپۆلی قڕکردن، سووتاندن و لەناوبردنی ژینگەی ئەم نیشتمانە لەلایەن کەسانێکی هەل پەرەست، نیشتمان فرۆش، تاڵانچی و موزایدەچییەوە، لەوپەڕی نائینسانیەوە، تاتارئاسا دراوەتەوە بەر پەلامار و بەداخەوە زۆر بێ ڕەحمانە و بێ هیچ چەشنە پڕەنسیپێکی ئەخلاقی و لەوپەڕی بێ ئەدەبییەوە بێ سڵکردن لە هیچ لایەک، بە بیانووی ئەوەی کە بە خەیاڵی خۆیان ئەندامانی چیا دەستیان داوەتە بڕینی شەوانەی باخەکانیان و گوزارش لێدانیان، دەستیان کردووە بە بێ حورمەتی بە ئەندامانی ئەنجومەنەکەمان و دەستیان داوەتە کردوەوەی نەشیاو. کورد وتەنی: " دز ئازابوو ساحێب ماڵی گرت".
زۆر جێی داخە بۆ ئەم شار و وڵاتە کە دوو کەس لە ڕۆڵە گیان فیداکانی، گیانی ئازیزیان پێشکەش بە بەرگری لە فەوتان و تاڵانی نیشتمان ئەکەن بەڵام، تاڵانچیگەلێک بۆ بەرژەوەندیی تاکەکەسی خۆیان بەمجۆرە ڕوو ئەکەنە قڕکردنی ئەم خاکە و بەو پەڕی بێ ئەخلاقیشەوە هەڕەشە لە نیشتمان دۆستان و ژینگەپارێزان و ئەندامانی ئەنجومەنی سەوزی چیا ئەکەن.
بۆیە هەر لێرەوە ڕاشکاوانە بۆ ڕای گشتی ڕادەگەیەنین کە:
١_ڕەوتی بڕینی باخەکان و دەرهانیان یان گوزارش و شتی لەو چەشنە، هیچ پێوەندییەکی بە چیا و ئەندامانیانەوە نییە و چیا چوارچێوە و یاسا و ڕێسای تایبەت بە خۆی هەیە و شێوە کاری خۆی بە سەدان جار ئەزموون کردووە.
٢_لە هەموو دڵسۆزانی ئەم ئاو و خاکە داواکارین چیتر نەیەڵن ئەم ڕەوتی قڕ کردنی وڵاتە بەردەوام بێ و ئەبێ بە گشتمان بەر به نیشتمان فرۆشان و تاڵانچیانی وڵات بگرین بۆ نەوەکانی داهاتوو.
٣_جارێکیتر دووپاتی دەکەینەوە هەڕەشە و گوڕەشە و قسەی ناشیرین و ناشیاو بەرانبەر بە ئەندامان و ئەنجومەنەکەمان بوەستێنن، چونکە دڵنیابن ئەگەر دووبارە بێتەوە چیتر بەرانبەر بێ ڕێزی و بێ حورمەتی بە ئەندامان، شەهیدانمان و چیای سەربەرزمان بێدەنگ نابین؛ بست‌بەبست و داربەدار و ئەوەی سووچ و شاردراوەی کاولکاری و داگیرکارییەکانی ژینگە و دارستانی نەتەوەییمانە بە بەڵگە و وێنە و ناو و شوێن بۆ بەرچاوی خەڵک و ڕای گشتی ئاشکرایان ئەکەین و ڕاشەکاوانە بە پێی نەخشە لە قاویان ئەدەین.
ئاڤاتودەی ڕایدەگەیەنێت وەک تۆڕێکی میدیایی سەربەخۆ و لە هەمانکاتدا بەرپرسیار بەرامبەر ژینگە و ژیاری ڕۆژهەڵاتی کوردستان، وەک پرەنسیپی کاری ڕابردووی خۆی کە بەردەوام پشتیوانی خەباتی ژینگەپارێزان بووە، درێژە بە پشتیوانیەکانی خۆی لە چالاکی تەژی لە ئەوین بۆ وڵات و ژینگەی ژینگەپارێزانی ڕۆژهەڵاتی کوردستان دەدات.
ئاڤاتودەی هەر جۆرە هەڕەشە و بێڕیزیەک لە ژینگەپاریزانی سەوزی چیا مەحکوم دەکات. ئێمە وەک پیشەی ساڵانی ڕابردووی خۆمان هاوکار دەبین لە پێناو لەقاودان و ئاشکراکردنی ئەوانەی بە مەبەستی قازانجی شەخسی خۆیان و هەروەها بە پیلانی سوپای پاسداران قۆڵیان لە وێران کردنی ژینگەی ڕۆژهەڵات هەڵماڵیوە.
