عەبدولناسر قەرەداش، ئەندامی پلەبەرزی داعش، باسی لە کووشتنی ٩٠٠ لاوی عێراقی لە پارێزگای ئەنبار کرد. ناوبراو لەو وتووێژەدا باسی لە کێشەی قوڵی چەکدارە عەرەب و نا عەرەبەکانی نێو داعش کردووە.
ڕێکخراوی ئیتلاعاتی عێراق، شەوی ڕابردوو هەواڵی دەستبەسەرکردنی قەرداشی بڵاو کردەوە و ڕایگەیاند ناوبراو پاڵێوراوی جێگرەوەی ئەبوبەکر بەغدادیە.
قەرەداش لە سیما پلەباڵاکانی داعش و بە تایبەت لە بواری بەرهەمهێنانی چەک و مادەی تەقینەوە بووە و دەیان بەڵگە بە واژۆی ناوبراو دۆزراوەتەوە کە نیشانی گرینگی ڕۆڵی لە نێو گرووپی داعشە.
عەبدولرەحیم عەبدوڵلا بەکر لغسانی ناسراو بە عەبدولناسر قەرەداش ساڵی ١٩٦٧ لە تەلەعفەر لە دایک بووە و لە ناوچەی موشیرفەی مووسڵ ژیاوە و ساڵی ٢٠٠٧ بووە بە ئەندامی داعش.
ناوەندی هەواڵدەری عێراق لە ڕاگەیەندراوێکدا باسی لەو چالاکیە سەربازیانە کردووە کە قەرەداش تێیاندا بەشدار بووە و ڕایگەیاند قەرەداش فەرماندەی سەرەکی لە هێرشەکانی سەر کوبانی و چالاکی داگیرکردنی شارەکانی تەدمەر، حەلەب، دیمەشق و باب بووە و هەروەها لە شەڕەکانی باغوز کە دوایین پەناگەی داعش بوو ڕۆڵێکی یەکجار گرینگی هەبووە.
قەرەداش هەروەها یەکێک لە دانوستانکارە دیارەکانی داعش لەگەڵ گرووپە چەکدارە خۆجەییەکان بووە و ئاگاداری هەموو ڕێکخستنێکی ئیداری و وردەکاری کارگەکانی بەرهەمهێنانی چەکی داعش بووە.
