ئانتۆنیۆ گۆتێرێش، سکرتێری گشتی نەتەوە یەکگرتووەکان قەیرانی کۆڕۆنای وەک گەورەترین چاڵشی بەشەریەت لە دوای شەڕی جیهانی دووهەم ناوبرد. سەبارەت بە لێکەوتە ئابوری و سیاسیەکانی هۆشداری دا و ئەو کۆڕۆنای بە تاقیکاری گەورە ناوبرد.
هەواڵدەری ئاڵمان ڕۆژی چوارشەممە ١٣ی خاکەلێوە بە بڵاوکردنەوەی ڕاپۆرتێک لە نیۆیۆرک لە زمان گۆتێرێش گووتویەتی: کۆڕۆنا گەورەترین چاڵشی مرۆڤایەتی لە دوای شەڕی جیهانی دووهەمە و پێویستی بە وڵامێکی بەهێز و کاریگەرە.
گۆتێرێش جەختی لەوە کردووەتەوە مرۆڤایەتی تەنیا لە ڕێگەی هاوپێوەندی جیهانی دەتوانێ لەو تاقیکاریە سەرکەوتوو بێتە دەرێ. سکرتێری گشتی نەتەوە یەکگرتووەکان ئەو قسانەی لە پەیامێکی ڤیدیۆییدا ڕووبە خەڵکی جیهان کرد و تێیدا باسی لەوە کردووە جیهان هیچ کات لە بەرابەر وەها تاقیکاریەک نەوەستاوەتەوە.
بە باوەڕی گۆتێرێش جیهان تا ئێستا ئەوجۆرەی کە دەبێ و پێویستە ڕووبەڕووی ئەو ڤایروسە نەبووەتەوە و گلەیی لە کەمتەرخەمیەکان کرد.
سکرتێری گشتی نەتەوەیەکگرتووەکان ڕەخنەی لە نەبوونی ناوەندێکی هاوئاهەنگی نێودەوڵەتی بۆ ڕووبەڕووبونەوەی بڵاوبوونەوەی ڤایروسی کۆڕۆنا گرت و بە بڕوای ناوبراو ڕێکخراوی جیهانی تەندرووستی دەبێ ڕێبەری ئەو بەربەرەکانیە لە ئاستی جیهاندا بگرێتە ئەستۆ.
گۆتێرێش پێیوایە زۆربەی ڕێوشوێن و پێشنیارەکان لە ئاستی جیهاندا وەبەرچاو ناگیرێن.
ئانتۆنیۆ گۆتێرێش ڕۆژئ سێشەممە ٣١ مارس بەرنامەی جیهانی نەتەوەیەکگرتووەکانی بۆ ڕووبەڕوو بوونەوە لەگەڵ دەرکەوتە ئابوری و کۆمەڵایەتیەکانی کۆڕۆنا ڕایگەیاند.
لەقسەکانیدا گوووتی: داوێن و بەربڵاوی ئەو هەوڵانە دەبێ بارتەقای ئەو قەیرانە بێت کە بەهۆی بڵاوبوونەوەی ئەو نەخۆشیە بڵاو بووەتەوە.
بە باوەڕی گۆتێرێش سیاسەتی هاوبەشی جیهانی بۆ ڕووبەڕوو بوونەوەی کۆڕۆنا دەبێ لەسەر بنەمای هاوکاری و بەرپرسایەتی بەشکراو بێت و پشتیوانی لە ولاتانی هەژار بۆ ڕووبەڕووبوونەوەی کۆڕۆنا بە پێویست و زەروری ناوبرد.
