سوپای پاسداران شەپۆلێکی فراوانی دەستگیرکردنیان دژی سەرکردە باڵاکانی بەرەی ڕیفۆرمخواز دەستپێکرد و تۆمەتی "کارکردن بۆ بەرژەوەندیی بێگانە"یان دەدەنە پاڵ.
سوپای پاسداران رۆژی دووشەممە جەواد ئیمام، گوتەبێژی بەرەی ڕیفۆرمخوازانی دەستگیر کرد. ئەمە دوای دەستبەسەرکردنی ئازەر مەنسووری، سەرۆکی بەرەکە و ئیبراهیم ئەسغەرزادە و موحسین ئەمینزادە دێت. داواکاری گشتیی تاران ڕایگەیاند، ئەم کەسانە لە کاتی هەڕەشە سەربازییەکانی ئەمریکا و ئیسرائیلدا، هەوڵی تێکدانی سەقامگیریی وڵاتیان داوە.
غوڵامحوسێن موحسنی ئێژەیی، سەرۆکی دەسەڵاتی دادوەری، بڵاوکەرەوەی بەیاننامەکانی دژی حکوومەتی بە "هاودەنگی دوژمنان" ناو برد. ئەمەش دوای ئەوە دێت کە بەرەی ڕیفۆرمخوازان سەرەخۆشییان لە خێزانی قوربانییانی خۆپێشاندانەکان کردبوو و ڕایانگەیاندبوو: "ڕێگە نادەین خوێنی ئازیزانتان فەرامۆش بکرێت."
ئازەر مەنسووری لە ڕاگەیەنراوێکدا سەرەخۆشی لە خێزانی قوربانییانی خۆپێشاندانەکانی مانگی کانوونی دووەم کردبوو و گوتبووی: "ئێمە دەستمان بە میدیا ناگات، بەڵام بە خێزانە ماتەمبارەکان دەڵێین ئێوە تەنیا نین؛ ڕێگە نادەین خوێنی ئازیزانتان فەرامۆش بکرێت."
ئەم شەپۆلە نوێیەی دەستگیرکردنەکان نیشانەی توندتربوونی مامەڵەی حکوومەتە لەگەڵ ئەو دەنگە سیاسییانەی کە دوای ناڕەزایەتییەکانی ئەم دواییە، داوای گۆڕانکاریی ڕیشەیی و کۆتاییهێنان بە توندوتیژییەکان دەکەن.
