بەرەبەیانى ئەمڕۆ سوپاى پاسداران چەندین مووشەکى نا بە دوو بنکەى سەربازى هێزەکانى ئەمریکا لە عێراق کە یەکێکیان بنکەى عەین ئەسەد بوو و چەند مووشەکیش لە هەولێر و نزیک فڕۆکەخانەى هەولێر کەوتنە خوارەوە.
وەزارەتى بەرگرى ئەمریکا لەمبارەوە بەیاننامەیەکى بڵاو کردەوە کە تێیدا هاتووە:
ڕژێمى ئێران لە ڕێکەوتى ٧ى ژانویە، نزیک ٥:٣٠ى پاشنیوەڕۆ (بە کاتى ڕۆژهەڵاتى ئەمریکا)، زیاتر لە ١٢ مووشەکى بالستیکى بە هێزە سەربازییەکانى ئەمریکا و هاوپەیمانانەوە نا لە عێراق. ڕوونە کە ئەم مووشەکانە لە ئێرانەوە تەقێنراون و بەلانى کەم دوو بنکەى سەربازى ئەمریکا لە عەین ئەسەد و هەولێر کە هێزى سەربازى ئەمریکا و هاوپەیمانانى لێیە، کردە ئامانج.
ئێمە خەریکى هەڵسەنگاندنى سەرەتایین لە زەرەر و زیانەکانمان.
وەزارەتى بەرگرى ئەمرکیا لە چەند ڕۆژى دوایی و بەرامبەر هەڕەشە و جووڵەکانى ئێران، هەموو ڕێوشوێنێکى پێویستى بۆ پاراستنى ئەندامەکانى و شەریکەکان گرتووەتە بەر. بە هۆى بوونى نیشانەگەلى پیلانى ڕژێمى ئێران بۆ هێرشکردنە سەر هێزەکانمان و بەرژەوەندییەکانمان لە ناوچەکە، ئەم بنکانە لە دۆخێکى هۆشدارى زۆر بەرزدا بوون.
ئێمە لە حاڵێکدا کە خەریکى هەڵسەنگاندنى دۆخ و کاردانەوەکانمانین، هەموو ڕێکارێکى پێویست بۆ پاراستنى هێز و هاوبەش و هاوپەیمانەکانى ئەمریکا لە ناوچەکە ئەنجام دەدەین.
بە هۆى ماهیەت و گرژى دۆخەکە، ئێمە بەردەوام زانیارى دەخەینە ڕوو و زانیارییەکان ئەپدەیت دەکەینەوە.
