تیمە ئەمنیەکانى بەرەنگاربوونەوەى ماددە هۆشبەرەکان لە دەروازەى زەرباتیەی هاوسنوور لەگەڵ ئێران لەپارێزگاى واست لە باشوورى عێراق، دەستیان بەسەر کۆمەڵێک کاڵای هۆشبەردا گرت.
دەستەى دەروازە سنوورییەکانی عێراق ئاشکراشی کردووە "تیمەکانمان توانیان دەست بەسەر کاڵایەکى زۆری ماددەی هۆشبەردا بگرن"، بێ ئەوەى قەبارە و جۆرەکانى ئەو ماددە هۆشبەرە ئاشکرا بکات، تەنها ئەوەى روون کردەوە "لەلایەن هاووڵاتییەکى عێراقییەوە هەوڵ دراوە لە وڵاتى ئێرانەوە بهێنرێتە عێراق".
ساڵانە دەیان کاڵاى جۆراجۆر لە سنوورە هاوبەشەکانى عێراق و ئێران هاوردە دەکرێن کە بەشێک لەو کاڵایانەش بە قاچاخ جموجۆڵییان پێوە دەکرێت. دامەزراوە عێراقییەکەش دووپاتیان کردەوە "خاوەنى کاڵا هۆشبەرەکە ڕەوانەى هۆبەى بەرەنگاربوونەوەى ماددە هۆشبەرەکانى بەدرە کراوە، بۆ ئەوەى رێکاری یاسایی بەرامبەری بگرێتە بەر"، هەرچەندە یەکێک لە فەرمانبەرانى ئەو هۆبەیە باسى لەوە کردووە کە کۆمارى ئیسلامى ئاسانکارییەکى زۆر دەکات بۆ گەیشتنى ماددەى هۆشبەر لە وڵاتەکەیەوە بۆ عێراق، "ئەمەیش دەرخەرى ئەوەیە کە دسەڵاتى ئێران خوازیارە بەم ماددەیە لاوانى عێراقى ئاڵوودە بکات".
