ناوی ئەو یەکیەتییە "هاوپێوەندی لە پێناو ئازادی و بەرابەری لە ئێراندا" یا "همبستگی برای آزادی و برابری ایران" ە
ئەو یەکیەتییە کە لە شاری هانۆڤەری ئەڵمان پێک هاتووە لە دە حیزب و ڕێکخراوی سیاسی و ئامانج لە دامەزراندنی دەستەبەرکردنی ئازادی و بەرابەرییە لە ئێراندا.
ئەوحیزب و ڕێکخراوانەی لەو یەکیەتییەدا هەن بریتین لە:
ـ یەکیەتی دیموکراتیکی ئازەربایجان- بیرلیک
ـ بزووتنەوەی کۆماریخوازانی دیموکرات و لائیکی ئێران
ـ حیزبی تەزامون دێموکراتیکی ئەهواز
ـ حیزبی دیموکراتی کوردستانی ئێران
ـ حیزبی دیموکراتی کوردستان
ـ حیزبی کۆمەڵەی کوردستانی ئیران
ـ حیزبی خەڵکی بەلوچستان
ـ ڕێکخڕاوی فیداییانی خەڵقی ئێران
ـ شوڕای کاتی سۆسیالیستە چەپەکانی ئێران
ـ کۆمەڵەی زەحمەتکێشانی کوردستان
خاڵی جێگای سرنجی پێکهاتنی ئەو یەکیەتییە بڵاوبووکردنەوەی تابڵو و نووسراوەکانی بە ٥ زمانی عەرەبی، کوردی، ئازەری، تورکەمانی و فارسی بوو. ئەمەى خوارەوەش بەیاننامەى ئەو یەکیەتییەیە کە پێکهاتووە:
ڕاگەیەندراوی دەسپێکردنی چالاکی:
هاوپێوەندی لە پێناو ئازادی و بەرابەری لە ئێراندا
چل ساڵ لە دەسەڵاتی ڕێژیمی ئیسلامیی ئێران تێپەڕ دەبێت، لەو ماوەیەدا بەرهەمێکی جیا لە جەنایەت، سەرکوت، کوشتار و ئێعدام، تاڵان و بەرزبوونەوەی هەژاری بۆ خەڵک نەبووە. لە وەها دۆخێکدا، شایەتی ئەوە بووینە کە کۆمەڵانی خەڵک بۆ لابردنی هەڵاواردن، ئازادی و دادپەروەریی کۆمەڵایەتی، خەبات بۆ بەرانبەریی نەتەوەکانی ئیران ناڕەزایەتییان دەربڕیوە، لە هەمان کاتدا بزووتنەوە کۆمەڵایەتی و کرێکارییەکان، ژنان، خوێندکاران، وەرزێڕان، فەرهەنگییان، پاراستنی ژینگە، بێکاران و هەژارانیش بە هەمان شێوە ناڕەزایەتییان دەربڕیوه.
قووڵبوونەوەی قەیرانەکان چوارچێوەی کۆمەڵگای ئێرانی تەنیوە و لە لایەکی دیکەوە چڕتڕبوونەوەی دوژمنایەتی توندی ڕێژیمی ئێران لە ناوچە و ئاستی نێودەوڵەتیدا لە بواری پێوەندییەکاندا ڕێژیمی ئێرانی لە جارانی پێشوو بێهێزتر کردووە و خستووەیەتە سەرەولێژی ڕووخانەوە.
لەوەها دۆخێکدا درێژەی دەسەڵاتی ئەو ڕێژیمە جیا لە زیان و کێشەخولقێنیی زیاتر هیچ قازانجێکی نییە، هەر بۆیە هاوکاری و هەماهەنگیی هەموو هێزەکانی کۆماریخواز و دێموکرات بۆ پشتیوانی لە خەباتی خەڵک لە هەموو کاتێکدا پێویستتره.
بە لێکدانەوە و تێگەیشتن لەو ڕاستییە ئێمە حیزب و ڕێکخراوەکانی واژۆکاری ئەو ڕێککەوتنە لە ڕێکەوتی ٢٥ی خەزەڵوەری ١٣٩٧ی هەتاوی، بەرانبەر بە ١٦ی نوامبری ٢٠١٨ی زایینی، هاوکاریی فەرمیی خۆمان ڕادەگەێنین.
هاوپێوەندی لە پێناو ئازادی و بەرابەری لە ئێراندا
بەپێی ئەو ڕێککەوتنە، ئێمە بە شێوەی هاوبەش بۆ ڕووخانی ڕێژیمی ئیسلامیی ئێران و دانانی نیزامێکی هەڵقووڵاو لەسەر دەنگدانی خەڵک بەپێی کۆماری، دێموکراسی، جیایی دین لە دەوڵەت و فیدراڵیزم کە دابینکردنی مافی نەتەوەیی ـ دێموکراتیک خەڵک بێت؛ خەبات دەکەین.
ئێمە پشتیوانی لە خەباتی ئازادیخوازانە و مافویستانەی خەڵکی ئیران دەکەین و بۆ کۆتاییهێنان بە زوڵم و زۆر و دابینکردنی مافی بەرانبەر، ئێرانێکی فیدراڵ، ئازاد، ئاوەدان، دێموکراتیک و یەکپارچە و یەکگرتوو خەبات دەکەین.
ئێمە خوازایاری ئازادی و ئاشتین و دژی سیاسەتی دەستێوەردانی ڕێژیمی ئێسلامیی ئیران، لە ناوچە و جیهانداین.
هاوپێوەندی لە پێناو ئازادی و بەرابەری لە ئێراندا، بە مەبەستی بەرینترکردن و بەشداریی لایەنەکانی دیکە لە ئێراندا دەستی هاوکاری بۆ هەموو بنکە، ناوەند، ڕێکخراو، حیزب و کەسایەتییەکان و باقی لایەنەکانی دیکە ڕادەکێشێت.
هاوپێوەندی لە پێناو ئازادی و بەرابەری لە ئێراندا
٤ی ڕەشەمەی ١٣٩٧ی هەتاوی
٢٣ی فیورییەی ٢٠١٩ی زایینی
