عەلی خامنەیی، ریبەری کۆماری ئیسلامی ڕۆژی دووشەممە ٢٩ ڕێبەندان کۆنفڕانسی وارشۆی بە شکستخواردوو زانی و بە هێرشکردنە سەر بە گووتەی ئەو "دانیشتنی پێکەوەی وڵاتانی بە ڕواڵەت موسڵمانی عەرەب و ئیسرائیل"، ئەو دانیشتنەی بە هۆی ئابڕووچوونی ئەو وڵاتانەی زانی.
ڕێبەری کۆماری ئیسلامی گووتی دەسەڵاتدارانی مێشک چکۆلەی ئەمریکا بە بانگهێشتکردنی دەوڵەتانێکی لاواز و ترساو تەمای بڕیاڕگرتنی دژی ئێرانیان هەبوو بەڵام بە گووتەی ناوبراو ئەو دانیشتنە بە هیچ ئەنجامێک نەگەیشتووە و هەموو ئەوانە نیشانەی لاوازی زانی. لە درێژەی ئەو بەشەی قسەکانیدا گووتی دووژمن کە کەوتە قۆناغی لاوازبوونەوە تووشی توڕەبوون دەبێت و دەست دەکات بە جنێودان و پشێوینانەوە. عەلی خامنەیی هۆشداری دا کە ئەو پشێوینانەوانە نابێ ببێتە هۆی دڵخۆشبوونی فڵان بەرپرس یان ئەوەی ببێتە هۆی هەڵەکەردنی لاوان.
کۆنفڕانسی ئاشتی و ئەمنیەت لە ڕۆژهەڵاتی ناوەڕاست ڕۆژەکانی چوارشەممە و پێنج شەممەی ڕابڕدوو بە بەشداری نوێنەرایەتی زیاتر لە ٦٠ وڵاتی دونیا لە وارشۆی پایتەختی لهێستان (پۆڵەندا) بەڕێوە چوو.
بە پێی بەڵگەی کۆتایی ئەو کۆنفڕانسە کە ئەمریکا و لهێستان ئامادەیان کردبوو، ئاماژە بەوە درابوو کە حەوت گرووپی کاری پێکهاتوو لە کۆنفڕانسەکەدا بۆ بەدواداچوونی کاروباری ڕۆژهەڵاتی ناوەڕاست بە تایبەت سەبارەت بە خەبات دژی ترۆریزم و پشتیوانی ماڵی لێیان، ڕێگەکانی پێشگرتن بە پەرەدان بە بەرنامە موشەکیەکان، پرسی کۆچبەران و ئەمنیەتی ئاسمانی لە حەوتووەکانی داهاتوودا درێژە بە کارەکانی خۆیان دەدەن.
