بە پێی ڕاپۆرتی هرانا، عیسا عیدمحەمەدی، فەرهاد شاکری، عیدەلحەکیم عەزیم گورگیج، عەبدولڕەحمان گورگیج، حەبیب پیرمحەمەدی، عەبدولباسێت ئورسەن، محەمەدڕەزا شێخ ئەحمەدی، مورتەزا فەکوری، عەبدوڵا حوسێنی، ۹ کەس لە بەندکراوانی سوونە مەزهەبی بەندیخانەی وەکیلئابادی مەشهەد، نامەیەکیان بۆ جاوید ڕەحمان، نوێنەری تایبەتی ڕێکخراوی نەتەوە یەکگرتووەکان بۆ کاروباری ئێران نووسیوە و تیایدا داوایان کردووە "بەدواداچوون بۆ دۆسییەکانیان" بکات.
ئەم بەندکراوانە لە بەشێک لە نامەکەیاندا ئاماژەیان بە لێدان و ئازار و ئەشکەنجەکردن و گوشار و پاڵەپەستۆکانى سەر خۆیان و بنەماڵەکانیان کردووە بە مەبەستی ددانپێدانانی زۆرەملێ. ئەم زیندانیانە لە لایەن هێزە ئیتلاعاتییەکانی کۆماری ئیسلامییەوە دەسبەسەر و نادادپەروەرانە حوکمی لەسێدارەدان و زیندانیکردنی درێژخایەنیان بۆ بڕاوەتەوە.
لە بەشێکی نامەکەدا هاتووە: «ئێمە، بە تۆمەتگەلی سەرتاسەر درۆ و بووختان و بە دروستکردنی مەلەف و دۆسییە، ئەشکەنجەکردنی سەخت، ددانپێنانی زۆرەملێ و لەپێشئامادەکراو، هەڕەشە و زیندانیکردنی ئەندامانی بنەماڵەکان و حوکمی نادادپەروەرانە و درێژخایەنی سەرووی ١٥ ساڵ یا حوکمی لەسێدارە، لە بەندی ۱/٦ داین. زەخت و گوشاریان تەواو چڕ کردووەتەوە و ئازارمان دەدەن. تەنانەت بە گوشار و دەستێوەردان لە بابەتی ژیانی کەسی و خێزانی، چەند کەسێکمان لە هاوسەرانمان جیا بووینەتەوە و منداڵەکانمان ئاوارە بوونە.»
