وێژەخەڵاتى بۆشنێر، کە یەکێکە لە گرنگترین خەڵاتە ئەدەبییەکانى ئەڵمانیا، ئەمساڵ دەبەخشرێتە لۆکاس برۆفۆس. ئەم درامنووسە سویسراییە، چەندین جار بە هۆى نووسینى بەرهەمگەلى پابەند، ستایش کراوە.
ئەکادیمیاى زمان و ئەدەبیاتى ئەڵمانیا ڕایگەیاند کە ئەمساڵ وێژەخەڵاتى گئۆرگ بۆشنێر، دەبەخشرێتە لۆکاس برۆفۆسى نووسەر و شانۆنامەنووسى سویسرایی. ئەکادیمیاکە لە بەیاننامەکەیاندا کە لەم بارەوە بڵاویان کردووتەوە، هاتووە لۆکاس برۆفۆس گرنگترین پرسى کۆمەڵایەتى و سیاسى ئەم ڕۆژگارە بە شێوەیەکى ڕاستگۆیانە و گەرموگوڕانە و بە زمانێکى سادە و ساکار لە بەرهەمەکانى خۆیدا باس کردووە.
لۆکاس برۆفۆس لە ساڵى ١٩٧١ى زایینى و لە شارى تونى سویسرا لەدایک بووە. لە ساڵى ١٩٩٨ـەوە دەستى داوەتە بڵاوکردنەوەى شانۆنامەکانى خۆى و بە خێرایی بووە یەکێک لە دیارترین شانۆنامەنووسەکان بە زمانى ئەڵمانى. "دژەنۆرمییە سێکسییەکانى دایک و باوکمان" کە لە سالى ٢٠٠٣ى زایینى بڵاوى کردەوە یەکێکە لە شانۆنامە سەرکەوتووەکانى ئەو کە وەرگێڕدراوەتە سەر چەندین زمانى دونیا. دواهەمین بەرهەمیشى "ڕۆحى فیل"ـە کە لە سپتەمبەرى ٢٠١٨ى زایینى و لە مانعایم برایە سەر سەکۆى شانۆ و سەرنجێکى گەورەى بۆ خۆى ڕاکێشا.
لە برۆفۆس، ڕۆمانێگەلێکى وەک "پیاوانى مردوو" لە ساڵى ٢٠٠٢ و "١٠٠ ڕۆژ" لە ساڵى ٢٠٠٨ى زایینى بڵاو بووەتەوە. ئەو لە دواهەمین ڕۆمانى خۆیدا باسى کارەساتى مەرگاوى ڕواندا دەکات. ئەو لە چیرۆکگەلێکى بێهەژمارى، ڕەخنەییانە دەکەوێتە شەن و کەوتى پرسە کۆمەڵایەتى و سیاسییەکانى ئەم سەردەمەى ئێمە.
خەڵاتى گئۆرگ بوشنێر، بڕەکەى ٥٠ هەزار یۆرۆیە و بە گرنگترین وێژەخەڵاتى ئەڵمانیا ناسراوە. بۆشنێر، درامنووسێکى ئینقیلابی ئەڵمانیا بوو کە شانۆنامەى "ویستک"ـى نێوبانگێکى گەورە هەبوو، بەڵام خۆى ژیانێکى کورتى هەبوو. لە ساڵى ١٨١٣ لە نزیکى دارمشتات لەدایک بوو و لە ساڵى ١٨٧٣ لە زوریخ کۆچى دوایی کرد.
دەستەى تاوتوێکەران و داوەرانى خەڵاتەکە لە شڕۆڤەى دەنگەکانى خۆیان نووسییان:
"برۆفۆس بە ستایلێکى قورس و قایم و ڕەنگاڵەیی و دەوڵەمەند، فۆڕمە گرێدراوەکان بە دۆخى ژیانى مۆدێڕن و بە شێوەیەکەى نوێگەرایانە و داهێنەرانە، لە ڕۆمان و شانۆنامەکانى شەن و کەو دەکات. ئەو لە کونجکۆڵییەکانیدا دونیاى ئەمڕۆ دەداتە بەر ڕەخنەى بوێرانە و تاوتوێى دەکات و تێڕوانینێکى لێوڕێژ لە موشتاقى و سەرسووڕمانى هەیە".
ئەم خەڵاتە لە ساڵى ١٩٥١ى زایینییەوە دەبەخشرێتە نووسەرانێک کە خزمەتێکى گەورەیان بە زمانى ئەڵمانى کردووە و ڕۆڵێکى دیاریان لە بڵاوکردنەوەى فەرهەنگى ئەڵمانى هەبووە. بەر لەم نووسەرەش، ئەم وێژەخەڵاتە بەخشرایە نووسەرانێکى وەک ئەریش کستنێر (١٩٥٧) و ماکس فریش (١٩٥٨) و گۆنتەرگراس (١٩٦٥) و سارا کیرش (١٩٩٦) و فۆلکێر براوان (٢٠٠٠). پارەکەش، ئەم خەڵاتە بەخشرایە ترێزا مورا.
