٥٦٩ ڕۆژنامەنووس و میدیاکار لە نامەیەکدا بۆ بەرپرسانی سێ دەسەڵاتی سەرەکی ئێران و نوێنەرانی پەرلەمانی ئەو وڵاتە ڕەخنەیان لە دەستبەسەر کرانی هەر دوو ڕۆژنامەنووس مەرزیە ئەمیری و مەسعود کازمی گرتووە و داوای ئازاد بوونیان دەکەن.
بە پێی ڕاپۆڕتی ئیرنا پلاس، واژۆکەرانی ئەو نامەیە بە نیشانەی ناڕەزایەتی درێژبوونەوەى ماوەى دەستبەسەرکرانی ئەو دوو کەسە، داوایان لە نوێنەرانی پەرلەمان، حەسەن ڕوحانی و ئیبرایم ڕەئیسی کردووە بە مەبەستی پاریزوانی لە خاڵەکانی ٩ و ٢٤ یاسای بنەڕەتی و یاسای تایبەت بە چاپەمەنییەکان، بە ئاقاری پشتیوانی لەو قەڵەمبەدەستانەی کە لە ماوەی ساڵانی ڕابردوودا چەندین جار بوونەتە قوربانی بۆشایی یاسایی پشتیوانی و نەبوونی ئەمنیەتی کاری، هەنگاو هەڵێننەوە و کار بکەن بۆ ئازادبوونی ئەو دوو ڕۆژنامەنووسە.
مەسعود کازمی بە تاوانی بڵاوکردنەوەی هەواڵی درۆ، بێڕێزیکردن بە ڕێبەری و پیرۆزییەکانی دیکە بە چوار ساڵ و شەش مانگ زیندان و دوو ساڵ بێبەش بوون لە چالاکی لە ڕۆژنامەکانی ئێران سزا دراوە.
بارمتەی یەک ملیاری بۆ ئەو ڕۆژنامەنووسانە دیاری کراوە. مەسعود کازمی پێشتر هاوکاری ڕۆژنامەی شەرق و بەڕێوەبەری مانگنامەی "صدای پارسی" بووە.
مەرزیە ئەمیری، ڕۆژنامەنووسی ڕۆژنامەی شەرقە کە ئەو ساڵ لە کاتی بەشداریکردن لە ڕێوڕەسمی ڕۆژی جیهانی کرێکار لە لایەن هێزە ئەمنییەکانی ئێران دەستبەسەر کراوە.
