رێکخراوی مافی مرۆڤی ئێران (IHR) نوێترین ئاماری قوربانیانی خۆپێشاندانەکانی بڵاوکردەوە و رایگەیاند، تاوەکو ئێستا لانیکەم سێ هەزار و ٤٢٨ خۆپێشاندەر بە تەقەی هێزە ئەمنییەکان کوژراون و هەزارانی دیکەش بریندار بوون.
رێکخراوەکە کە بنکەکەی لە ئۆسلۆی پایتەختی نەرویجه، لە راپۆرتێکدا ئاماژەی بەوە کردووە، بەهۆی رێگرییە ئەمنییەکان و شاردنەوەی زانیارییەکان، ئەگەری هەیە ژمارەی راستەقینەی کوژراوان زۆر لەو ئامارەی راگەیێندراوە زیاتر بێت.
بەپێی راپۆرتەکە، لە کاتی دەسپێکی ناڕەزایەتییەکانەوە تاوەکو ئێستا، زیاتر لە ١٠ هەزار خۆپێشاندەر لە شارە جیاوازەکانی ئێران و رۆژهەڵاتی کوردستان دەستبەسەر کراون. رێکخراوەکە هێزە ئەمنییەکانی تۆمەتبار کردووە بەوەی "تەقەیان لە بریندارانی سەر شەقامەکان و نێو ناوەندە پزیشکییەکان کردووە."
رێکخراوی مافی مرۆڤی ئێران نیگەرانیی قووڵی خۆی لەبارەی چارەنووسی دەستبەسەرکراوەکان دەربڕیوە و هۆشداری داوە لەوەی، ئەگەری هەیە دوای "دادگاییکردنی رووکەش"، حکومەتی ئێران پەنا بۆ لەسێدارەدانی بەکۆمەڵی خۆپێشاندەران ببات.
لە کۆتایی راپۆرتەکەدا، داوا لە کۆمەڵگەی نێودەوڵەتی کراوە، بۆ پشتیوانیکردن لە خەڵکی ئێران و رێگری لە "ئەنجامدانی تاوانەکان" و لەسێدارەدانی ناڕازییان، هەنگاوی بەپەلە و کردەیی بنێن.
