هاکان فیدان، وەزیری دەرەوەی تورکیا ڕایگەیاند، ئیسرائیل بەدوای دوژمنێکی نوێدا دەگەڕێت و لەوانەیە تورکیا بکاتە ئامانج. ئەم هۆشدارییە دوای ئەوە دێت کە ڕەجەب تەیب ئەردۆغان، سەرۆککۆماری تورکیا، بە توندی هەڕەشەی دەستوەردانی سەربازیی هاوشێوەی قەرەباغ و لیبیای لە دژی ئیسرائیل کرد.
ئەردۆغان ئیسرائیلی بە "تۆڕێکی جێنۆسایدی خوێناوی" ناوبرد کە منداڵان و سڤیل لە فەڵەستین و لوبنان دەکوژێت. لە بەرامبەردا، لایەنی ئیسرائیلی بە توڕەییەوە وەڵامی دایەوە و ئەردۆغانی بە "دکتاتۆرێکی مەزنایەتیخواز" وەسف کرد کە دەیەوێت وەک "سوڵتانێکی عوسمانی" دەربکەوێت، لە کاتێکدا ئابووریی وڵاتەکەی بەرەو داڕمان دەچێت و دیموکراسی تێیدا مردووە.
لوتکەی ناکۆکییەکان دوای ئەوە هات کە دادگایەکی ئیستانبوڵ فەرمانی دەستگیرکردنی بۆ نەتانیاهۆ و 35 بەرپرسی دیکەی ئیسرائیلی دەرکرد. هۆکارەکە بۆ ڕێگریی هێزی دەریایی ئیسرائیل لە کاروانی کەشتییەکانی "سومود" لە تشرینی یەکەمی 2025 دەگەڕێتەوە. ئێستا هەردوو وڵات لە شەڕێکی دیپلۆماسی و میدیایی تونددان کە مەترسیی پێکدادانی سەربازیی لێدەکرێت.
