کۆریای باکوور پێنجشەممە، دوو مووشەکی تاقی کردەوە و وەک سەرچاوە هەواڵییەکان و بە تایبەت سەرچاوەکانی کۆریای باشوور باسی دەکەن، یەکێک لە مووشەکەکان نوێ بووە.
بە پێی ڕاپۆرتی ڕۆیتەرز، بەرپرسێکی فەرمی وەزارەتی بەرگری کۆریای باشوور بەو هەواڵدەرییەی گووتوە "یەکێک لەو مووشەکانە نوێ بووە و لە ڕووی مۆدێلەوە گەشەپێدراو و هۆشمەند بووە".
موشەکە نوێیەکەی کۆریای باکوور ٦٩٠ کیلۆمەتر مەودا دەبڕێت و بەمەش گەورەترین مەترسى لەسەر دەوروبەر و ناوچەکە و دونیا دروست دەکات. مووشەکی دووهەمیش دوای تێپەڕبوونی ٤٣٠ کیلۆمەتر لە کەناراوەکانی ڕۆژهەڵاتی کۆریای باکوور کەوتووەتە خوارەوە.
سەرۆکی هێزە چەکدارەکانی کۆریای باشوور بەرەبەیانی پێنجشەممە ڕایگەیاند " کۆریای باکوور لانیکەم مووشەکێکی نەناسراوی تاقی کردووەتەوە و کەمێکش دواتر بڵاو بووە کە مووشەکەکان دووان بوون". کۆریای باکوور لە مانگی بانەمەڕی ئەمساڵ دوو مووشەکی ئەتۆمی ٢٧٠ کیلۆمەتر و ٤٢٠ کیلۆمەتربڕى تاقی کردەوە کە بووە مایەى نیگەرانى ناوچەکە و دونیا و لە نێو هەمووشیاندا کۆریاى باشوور، چونکە ئەم دوو کۆریایە لەمێژساڵە کێشە و مشتومڕیان لە نێو یەکتریدا هەیە و لەگەڵ ئەوەشدا کۆریاى باکوور هەمیشە مەترسی بووە لەسەر کۆریاى باشوور.
کۆریای باکوور لە مانگی ئەپرێلى ئەمساڵ، تاقیکارییە ناوەکی و مووشەکییەکانی ڕاگرتبوو و دوای ئەمە دووجار چاوپێکەوتن لە نێوان ڕێبەرانی ئەو ولاتە و ئەمریکا ئەنجام دراوە. دۆنالد ترامپ لە دانیشتنی دووەمیدا دیدارەکەی بە نیوەچڵی جێ هێشت و کەمێک دواتر لە کۆنفڕانسەکانی ڕۆژنامەنووسیدا هۆی ئەو کارەی گەڕاندبووە بۆ چاوەڕوانی زۆری کۆریای باکوور.
ئەمریکا ڕایگەیاندووە تەنیا لە ئەگەری ڕاگرتنی بەرنامە مووشەکی و ئەتۆمییەکانی کۆریای باکوورە کە ئامادەیە گەمارۆکانی سەر ئەو وڵاتە نەهێڵێت، بەڵام پیون یانگ دەڵێ لابردنی گەمارۆکان دەبێ هەنگاو بە هەنگاو لەگەڵ دانوسانەکان بچنە پێشەوە.
