یەکێک لە فەرماندەکانی حەماس ڕۆژی یەکشەممە ١٥ بانەمەڕ بە هۆی هێرشی ئاسمانی ئەرتەشی ئیسرائیل لە کاردانەوە بە موشەکهاوێژی فەلەستینییەکان لە لێواری غەزەوە بۆ ناوچەکانی باشوری ئیسرائیل، کوژرا.
بە پێی ڕاپۆڕتی ڕۆیتەرز ئەرتەشی ئیسرائیل لە ڕاگەیەندراوێکدا گووتی "حامد ئەحمەد عابد خدر" بەرپرسی بەشی گواستنەوەى دراو لە ئێرانەوە بۆ گرووپە چەکدارەکانی غەزە بوو و بە هۆی هێرشێکی ئامانجداری هێزی ئاسمانی ئەو وڵاتە کوژرا. ڕۆیتەرز لە زمان شایەتێکی فەلەستینی دەڵێ "ئەو بەرپرسەی حەماس لە ناو ئۆتۆمبێلەکەیدا بوو کە هێرشی ئاسمانی کرایە سەر". بە گووتەی فەلەستینییەکان ئەوە سێیەمین هێرشی ئامانجداری ئیسرائیلە لە دوای ساڵی ٢٠١٤.
دوای ئاراستەکردنی موشەک لە غەزەوە بۆ ئیسرائیل لە ڕۆژی شەممە، ئیسرائیل ناوەند و بیناکانی گرووپی حەماس و جیهادی ئیسلامی لە لێواری غەزە خستە بەر هێرشی ئاسمانی. وەزارەتی دەرەوەی ئەمریکا شەوی شەممە لە ڕاگەیەندراوێکدا هێرشی موشەکی لە لایەن حەماس و جیهادی ئیسلامی لە غەزەوە بۆ سەر خەڵکی سڤیلی ئیسرائیل بە تووندی مەحکوم کرد.
