هەواڵدەری تەسنیم لە ڕاپۆرتێکدا سەبارەت بە ئاستی هەناردەکردنی ئێران لە ناوچەکەدا بڵاوى کردووەتەوە "٥٤ لەسەدی هەناردەکانی ئێران لە ساڵی ۹۷ بۆ وڵاتانی دراوسێ بووە و سەرەڕای گەمارۆکان ئێران هێشتا دەرفەتی زۆری بۆ هەناردەکردن بۆ وڵاتان درواسێی هەیە".
لەم ڕاپۆرتە باسیش لەوە کراوە کە "۲۷ لەسەدی هاوردەکانی ئێران هەر لە وڵاتانی دراوسێ بووە ، چۆن تێچووی هاتووچوویان زۆر کەمترە، بە قازانجی هەناردە و هاوردەی ئێمەیە"، لە کاتێکدا بە هۆی گەمارۆکان و مایەپووچی بەشی پیشەسازی و بەڕێوەبەری هەڵەی بەشی کشتوکاڵ، تەنانەت ئاستی بازرگانی ئێران لە گەڵ وڵاتانی دراوسێش لە ساڵی ۹۷ هەتا ۳٦٪ دابەزیوە و بە دەسپێکردنی قوناغی نوێ لە گەمارۆکان ئەم دابەزینەش درێژەی دەبێت.
برایان هۆک بەرپرسى ژوورى ئێران لە وەزارەتى دەرەوەى ئەمریکا، ڕۆژی پێنجشەمە ٥ی بانەمەڕ جەختی لەسەر گەمارۆکان کردەوە و گوتی "ئەمریکا ستراتیژی و سەرچاوەیێکی نوێی بۆ پێشگرتن لە دەوردانەوەی گەمارۆکان هەیە و هەموو وڵاتانی دونیاش ئەم جیاوازییە و سووربوونی دەوڵەتی ترامپیان سەبارەت بە سزادانی ئەو وڵاتانەی کە بە دوای دەوردانەوەی گەمارۆکانن، بینیوە".
