ڕاپۆرتی ساڵانەی وەزارەتی دەرەوەی ئەمریکا سەبارەت بە پێشێلکارییەکانی مافی مرۆڤ لە ئێران، لە بەشێکیدا ئاماژەی بە دۆسیەی گرتن و ڕادەستکردنەوەی چالاکی سیاسیی کورد، بێهزاد خوسرەوی لەلایەن یەکیەتیی نیشتمانی کوردستانی عێراق بە کۆماری ئیسلامی كردووە؛ کردارێک کە بە گوێرەی چاودێران نموونەیەکی ڕوون لە هاوکاریی سنووربەزێن بۆ سەرکوتکردنی نەیارانی سیاسییە.
بە پێی ئەم ڕاپۆرتە، لە مانگی سپتامبری ساڵی ڕابردوو، هێزەکانی یەکیەتیی نیشتمانی کوردستانی عێراق لە شاری سلێمانی، بێهزاد خوسرەوی پەنابەری کورد و ئەندامی حیزبی دێموکراتی کوردستانی ئێرانیان دەسبەسەر و ڕادەستی کاربەدەستانی کۆماری ئیسلامی کرد. هەروەها بنەماڵەی خوسرەوی دووپاتیان کردووەتەوە کە دەسەڵاتدارانی هەرێمی کوردستان ناوبراویان لەم ڕادەستکردنەوەیە ئاگادار کردووەتەوە.
چالاکوانانی مافی مرۆڤ دەڵێن ئەم هەنگاوە بەشێک لە ڕەوتێكە کە تیایدا تاران بە هاوکاریی دەسەڵاتدارانی عێراق و تەنانەت تورکیا، ناڕازی و ڕەخنەگران لە دەرەوەی سنوورەکانی دەستنیشان دەكات و دەیانگرێت و دەیانگەڕێنێتەوە بۆ ئێران، ئەمەش کارێکە کە بە "ڕفاندنی سنوور بەزاندن" ناسراوە.
ئەم دۆسیەیە نەک هەر پرسیاری جددی سەبارەت بە پابەندنەبوونی دەسەڵاتدارانی یەکێتی بە بنەماکانی مافی مرۆڤ دەوروژێنێت، بەڵکوو بیرخستنەوەی ئەو ڕاستییە تاڵەیە کە نەیارانی کۆماری ئیسلامی تەنانەت لە دەربەدەریشدا لە هەڕەشە و سەرکوتکردن لە ئاسایشدا نین.
