دەزگاى ساختەکارى و ئامارسازى کۆمارى ئیسلامى دووبارە بەکار کەوتەوە و دەیهەوێت بە ساختەکارى، دەنگى ئایەتوڵاى کۆمەڵکوژ زیاتر لە ١٧ ملیۆن لەقەڵەم بدات.
بە پێى ڕاپۆرتى ئاڤاتودەى، شانگۆرییە گاڵتەجاڕییەکەى هەڵبژاردنى سەرکۆمارى، ڕووبەڕووى بایکۆتێکى گەورەى خەڵکى بووەوە و هەر لەبەر ئەمەش ڕابەران و سەرکردەکانى کۆمارى ئیسلامى دووبارە دەستیان بە ساختەکارى کردەوە.
ئاڤاتودەى پێشتر ڕایگەیاندبوو کە بەیتى عەلى خامنەیی دیکتاتۆر و فەرمانڕەواى ڕەهاى کۆمارى ئیسلامى، لە چەند فەرمان و بڕیارێکى بۆ وەزارەتى ناوخۆ و شووراى نیگەهبان، پێداگرى کردووەتەوە کە دەبێت ئاستى بەشداریکردنى هەڵبژاردنەکان لە سەرووى ٥٠% (نزیکەى ٥٣) ڕابگەیێنن.
هەر لەم ڕاستایەدا، سەرچاوەیەکى ئاگادار لە وەزارەتى ناوخۆى کۆمارى ئیسلامییەوە بە ئاڤاتودەى گوتوە کە ئەم بڕیارە لە لایەن دوو ناوەندەکەوە جێبەجێ کراوە و تا چەند کاتژمێرێکى دیکە دەرەنجامە ساختەکەى هەڵبژاردن بەم ئاستەوە ڕادەگەیێنن. هەروەها وەزارەتى ناوخۆ بە زوویی ئیبراهیم ڕەئیسى ناسراو بە ئایەتوڵاى کۆمەڵکوژ، بە بەدەستهێنانى سەرووى ١٧ ملیۆن دەنگ (واتە نزیکەى ٦٠%ى کۆى دەنگەکان) وەک سەرکۆمارى هەڵبژێردراو دیارى دەکات.
بێ ئەملا و ئەولا، ئەم ئامارە ڕاست نییە و خەڵکى و دونیا دڵنیان کە ئەم خوولەى هەڵبژاردن کۆمارى ئیسلامى مەشروعیەتى تەواوەتى لەدەست دا و هەڵبژاردنەکەش هەڵبژاردنى ساختەیە!
