ناوەندی هاوکاری حیزبەکانی کوردستانی ئێران کە پێکهاتووە لە چوار حیزبی ڕۆژهەڵاتی کوردستان بە بڵاو کردنەوەی راگەیەندراوێک پشتیوانی خۆیان لە خۆپێشاندان و مانگرتنی گەلانی ئێران بە هۆی زیاد بوونی نرخی بێنزین ڕاگەیاند.
لە بەشێک لە پەیامی ناوەندی هاوکاریدا هاتووە گرانکردنی بێنزین لە لایەن کۆماری ئیسلامیەوەلە کاتێکدایە کە خەڵکی ئێران بە تایبەت لە ماوەی یەک دوو ساڵی ڕابردوودا لە خراپترین دۆخی ژیان و بە ئابوریەکەی هەژارانەوە دەژین.
لە درێژەی ڕاگەیەندراوەکەی ناوەندی هاوکاری هاتووە: ئەگەرچی وڵاتی ئێران وڵاتێکی دەوڵەمەندە بە سامانی سروشتی بەڵام کۆماری ئیسلامی بە پڕۆژە ناپێویست و زیانبارەکانی، بە دزین و تاڵانی دارایی خەڵکی ئێران بۆ پشتیوانیکردن لە تیرۆریزمی نێودەوڵەتی و دەستێوەردانەکانی لە ناوچە و جیهان هۆکاری بەفیڕۆدانی سامانی ئێران و ئەو هەژاریە لە ڕادەبەدەرەی خەڵکی ئێرانە.
ناوەندی هاوکاری حیزبەکانی کوردستانی ئێران خۆپێشاندانی خەڵک بەرامبەر ئەو دۆخەی کۆماری ئیسلامی بۆ خەڵکی درووست کردووە بە ڕەوا و پێویست دەزانێ و پشتیوانی لێ دەکات.
لە کۆتاییدا ناوەندی هاوکاری داوای لە خەڵک کردووە تا بە چۆک داهێنانی ڕژیم و باندە مافیاییەکانی درێژە بە هەڵوێستی شیاو و بوێرانەیان بدەن.
